Nóser jańbyrdan keıin Almaty kóshelerin taǵy sý basty

ALMATY. KAZINFORM - Almatynyń keıbir jerasty ótkelderi men kóshelerin nóser jańbyrdan keıin sý basty, kommýnaldyq qyzmetter saldaryn joıýǵa kirisip ketti.

Almatylyqtar áleýmettik jelide ál-Farabı dańǵylynyń joǵary jaǵynda burshaq jaýǵanyn jáne jerasty ótkelderi jańbyr sýyna tolyp ketkeni týraly jarysa jazyp jatyr. 

Qala ákimdiginen málim etkendeı, 10 shildede jaýyn-shashynnyń mol túsýine baılanysty ál-Farabı dańǵylyndaǵy «Esentaı-Moll» SOO mańynda jańbyr sýy jınalyp qaldy. 

Bul jerge Bostandyq aýdany ákimdiginiń merdiger uıymy jáne «Almaty sý» kommýnaldyq qyzmetiniń tehnıkasy, Almaty TJD sorǵy stantsııasy jiberildi. 

Saǵat 21:30-daǵy jaǵdaı boıynsha sýdy sorý aıaqtaldy.

«Sonymen qatar, Jáńgir han kóshesi boıyndaǵy Ermensaı shaǵyn aýdanynda Almaty qalasy ákimdiginiń qutqarý qyzmetiniń arnaıy tehnıkasy aldyn ala jiberilip, statsıonarlyq sorǵylar daıyndyqqa keltirildi. Jaýyn-shashyn saldarynan sýdyń lokaldi jınalýy oryn aldy. Bul jerde Almaty qalasy ákimdiginiń qutqarý qyzmetiniń, Bostandyq aýdanynyń merdiger uıymy «Stam Servıs» JShS kúshteri jumys isteıdi, olar «Ilosos» arnaıy tehnıkasynyń, sondaı-aq eki statsıonarlyq sorǵynyń kómegimen sý sorýdy júrgizedi», - dep atap ótti ákimdikten.

Aýdan ákimdikterinde jumys óndirisin baqylaý boıynsha táýlik boıy kezekshilik uıymdastyryldy.

«Qazgıdromet» RMK boljamynsha, túnde aýa temperatýrasy +18...+20°C, erteń tústen keıin +29...+31 jáne kúndiz ótkinshi jańbyr jaýady dep kútilýde.