Nóser jańbyr, naızaǵaı: Almaty kóshelerin sý basty

ALMATY. KAZINFORM – Almatyda nóser jańbyr jaýyp, naızaǵaı oınap, ekpindi jel coqty. Qalanyń keıbir kóshelerin sý basty.

Sý astynda qalǵan kóshelerdegi kórinisti turǵyndar sýretke, vıdeoǵa túsirip, áleýmettik jelige salyp jatyr.

8 shilde kúni saǵat 18:20-dan bastalǵan jańbyr úzilispen kúni boıy jaýdy. Al, búgin keshten bastap tolassyz jaýyp tur. 

Aǵyn sýlar aryqtan asyp trotýarlarǵa jaıylyp jatyr. Ásirese kópirlerdiń asty men saılarda sý tizege jetip qaldy.

Almaty ákimdiginen atap ótkendeı, jańbyr bastalǵanǵa deıin bir táýlik ishinde 92 arnaıy tehnıka jáne 326 jumysshynyń kúshimen aryq jelileriniń problemalyq ýchaskelerin, aryq ótkelderin jáne kezdeısoq qoqysqa arnalǵan jerlerdi tazartý jumystary uıymdastyryldy. 360 tekshe metr qoqys syrtqa shyǵaryldy.

Jaýyn-shashyn kezinde jedel mobıldi brıgadalardyń sany 52-ge deıin ósti (ádette 36-40), sý tasqynynyń aldyn alý jáne problemaly jerlerde sýdyń kedergisiz ótýin qamtamasyz etý úshin motopompalar qoıyldy.

Sý tasqynynyń negizgi sebebi qatty jel kezinde qulaǵan butaqtardyń aryq jelileri men aryq ótkelderin biteýi, sondaı-aq turǵyndar kógaldar men trotýarlarǵa tastaıtyn qoqys.

Barlyǵy 436 arnaıy tehnıka, 28 motopompa jáne 780 jol jumysshysy jumyldyryldy.