Nóser jańbyr men daýyl: Aqtóbe turǵyndaryna eskertý jasaldy
ASTANA. KAZINFORM — Búgin Aqtóbe oblysynyń soltústiginde, ońtústiginde jáne ortalyǵynda jańbyr men naızaǵaı kútiledi. Kúndiz oblystyń soltústiginde keı jerlerde qatty jańbyr jaýyp, burshaq túsip, daýyl bolýy múmkin. Bul týraly Aqtóbe oblysynyń ákimdigi málim etti.
Sınoptıkterdiń boljamynsha, túnde jáne tańerteń oblystyń soltústiginde tuman kútiledi.
— Soltústik-batystan soǵatyn jeldiń ekpini kúndiz oblystyń ońtústiginde, shyǵysynda jáne ortalyǵynda 15–20 m/s-qa deıin jetedi, — delingen habarlamada.
Oblystyń ońtústiginde tótenshe órt qaýpi saqtalady.
Aqtóbe qalasynda jańbyr, naızaǵaı, kúndiz burshaq kútiledi.
Aýa raıynyń qolaısyzdyǵyna baılanysty qaýipsizdik sharalaryn saqtap, alys jolǵa shyǵýdy múmkindiginshe shekteńiz. Naızaǵaı kezinde ashyq alańdarda bolmaýǵa jáne qatty jel kezinde aǵashtar men álsiz konstrýktsııalardyń mańynda turmaýǵa keńes beriledi.
Aıta keteıik, aldaǵy kúnderi elimizdiń basym bóliginde jańbyr men naızaǵaı kútiledi.
