Nóser sýy shymkenttikterdi túnimen ábigerge saldy
Shymkentte qatty jaýyn-shashyn saldarynan qala kóshelerin sý basyp, júrginshilerge kóp kedergisin keltirdi. Jerasty joldary men aýlalar, kólik joldary sýǵa toldy.
Qala aýmaǵyndaǵy jańbyr sýyn sorý jumystaryn úılestirý boıynsha Tótenshe jaǵdaılar departamentiniń Daǵdarys ortalyǵynda jedel shtab quryldy.
«Jalpy sý sorý jumystaryna Tótenshe jaǵdaılar departamentiniń jeke quramynan 113 qyzmetker jáne 39 tehnıka, 38 motopompa, 1 jyljymaly, 255 qaptalǵan qum, jergilikti ákimshilikten 14 vodovoz, 2 motopompa jumyldyryldy. Jalpy 6834 tekshe metr sý soryldy. Zardap shekkender men qaıtys bolǵandar joq, jeke turǵyn úılerdi sý basýy oryn almady» - delingen Shymkent qalasy TJD qoǵammen baılanys toby taratqan habarlamada.
Jańbyr sýyn sorý jumystaryn júrgizý úshin 44 mekenjaıǵa kúshter men quraldar jiberilgen. Qyzmetkerler túngi saǵat 4-ke deıin jumys istep, kóshelerdi sýdan tazartty. Jeke sektordaǵy úılerdi sý almaýy úshin, qapqa salynǵan qumdar arqyly bógetter jasaldy.
«Qazir qalada jaǵdaı turaqty. Jerasty joldarynyń barlyǵy sýdan tazartyldy. Túnimen jeke quram kezekshilikpen jumys istedi. Búginde daýyldy eskertý jáne nóser jaýý týraly eskertý berilgen. TJD qyzmetkerleri kezekshilikti jalǵastyrýda», - dedi Shymkent qalasy TJD qoǵammen baılanys tobynan.
