Nóser sońy qarǵa ulasty: Shymkentte aǵash qulap, oqýshy qaza tapty
ShYMKENT. KAZINFORM – Shymkentte tolassyz jaýyn-shashynnan keıin kóshelerdi qar men sý basty. Kommýnaldyq qyzmetter kúsheıtilgen rejımge kóshirildi. Alaıda qaıǵyly jaǵdaı tirkeldi, aǵash qulap, saldarynan bir oqýshy kóz jumdy.
Shymkentte nóser jaýynnyń sońy qarǵa ulasyp, turǵyndardy ábigerge saldy. Qalyń ári jabysqaq qardyń salmaǵynan aǵash butaqtary synyp, keı aýdandar ýaqytsha jaryqsyz qaldy.
Sondaı-aq aryqtar bitelip, birqatar jolda sý jınalyp, «kólge» aınaldy. Sonyń saldarynan áleýmettik jelilerde jáne iKomek 109 jelisine turǵyndardan túsken ótinishter de jıilegen.
Ókinishtisi sol, Eńbekshi aýdanynda qaıǵyly jaǵdaı tirkeldi. Elshibek batyr kóshesindegi kópqabatty úılerdiń aýlasynda aǵashtyń bir bóligi qulap ketken. Aldyn ala málimet boıynsha, synǵan aǵashtyń astynda 4-synyp oqýshysy qalǵan. Bala oqıǵa ornynda kóz jumdy. Qazirgi ýaqytta oqıǵanyń mán-jaıyn polıtsııa departamentiniń qyzmetkerleri anyqtap jatyr.
Qala ákimdiginiń málimetinshe, kommýnaldyq qyzmetter kúsheıtilgen jumys rejımine kóshirilgen. Tańerteńnen bastap magıstraldy kósheler, aýlaishilik joldar, trotýarlar, aıaldamalar men áleýmettik nysandar táýlik boıy tazartylyp jatyr. Eń aldymen negizgi kólik joldary, qoǵamdyq kólik baǵyttary, aýrýhanalarǵa, mektepter men balabaqshalarǵa kireberis aýmaqtardy retke keltirý qolǵa alynǵan.
– Júrgizýshilerden jyldamdyq rejımin jáne araqashyqtyqty saqtaýdy, múmkindiginshe alys saparlarǵa shyqpaýdy suraımyz. Arnaıy tehnıkanyń jumysyna kedergi keltirmeý úshin kólikterdi jol jıegine qaldyrmańyzdar, – dep habarlady ákimdik ókilderi.
Mamandar aýa raıynyń qolaısyzdyǵyna baılanysty yqtımal qaýipter jóninde eskertý jasady. Qalyń qardyń saldarynan aǵashtardyń qaıta qulaýy nemese túrli nysandardyń zaqymdanýy múmkin. Osyǵan baılanysty turǵyndarǵa kólikterdi aǵashtar men elektr jelileriniń astyna qoımaý, serýendeý kezinde saq bolý eskertildi.
Bıyl qysqy maýsymda jumyldyrylǵan resýrstar kólemi artqan. Ótken jyly 183 tehnıka jumys istese, qazir memlekettik-jekeshelik áriptestik aıasynda 243 tehnıka tartylǵan. Kún saıyn kóshelerdi tazalaýǵa eki myńǵa jýyq jumysshy shyǵady. Sý basý qaýpi bar ýchaskeler baqylaýǵa alynyp, ınertti materıaldar men sý sorý tehnıkasy daıyndalǵan.
Budan buryn habarlaǵandaı, aldaǵy kúnderi keı óńirde 33 gradýs aıaz bolady.