Nóser saldarynan qala kóshesinde kólik sýǵa batsa, shyǵyndy qalaı óndirýge bolady
ASTANA. KAZINFORM — Astana qalasynyń kommýnaldyq sharýashylyǵy basqarmasy resmı saýalymyzǵa joldaǵan jaýabynda qatty nóserden keıin joldardy sý basyp, avtokólik sýǵa batsa, shyǵyn qalaı óteletini jóninde málimdedi.
– Kólik quraldaryna sý basý saldarynan keltirilgen zalaldy óteý máseleleri QR qoldanystaǵy zańnamasyna sáıkes qaralady. Zalaldy óteýge negiz bolatyn naqty mán-jaılar eskerile otyryp, zańnamada belgilengen tártippen qalalyq ákimdik qarajaty esebinen sheshiledi, – delingen habarlamada.
Vedomstvo málimetinshe, qabyldanǵan sheshimmen kelispegen jaǵdaıda ákimshilik rásimge qatysýshy QR Ákimshilik rásimdik-protsestik kodeksiniń 91 jáne 92-baptaryna sáıkes ákimshilik aktige, sondaı-aq ákimshilik áreketterge nemese áreketsizdikke sotqa deıingi ákimshilik tártippen shaǵymdanýǵa quqyly.
– Shaǵym ákimshilik aktisine, ákimshilik áreketine ne áreketsizdigine shaǵym jasalatyn ákimshilik organǵa, laýazymdy adamǵa beriledi. Ony ákimshilik tártippen sotqa deıingi qaraýdy Astana qalasy ákimdiginiń vedomstvolyq baǵynysty memlekettik mekemeleriniń jáne olardyń shaǵymdardy qaraý jónindegi jumys toby nemese basqarma basshysy júrgizedi. Shaǵym úsh aıdan keshiktirilmeı ákimshilik organǵa, laýazymdy adamǵa beriledi. Sondaı-aq, ýákiletti organnyń jaýabymen kelispegen jaǵdaıda, QR Ákimshilik rásimdik-protsestik kodeksiniń
91-babynyń 6-tarmaǵyna sáıkes ótinish boıynsha qabyldanǵan sheshimge ákimshilik rásimge qatysýshy sotqa shaǵymdanýy múmkin ekenin túsindiremiz, – delingen resmı jaýapta.
Aıta keteıik, buǵan deıin Astana kóshelerine ne sebepti jańbyr sýy jınalyp qalatynyn jazǵanbyz.
