Norvegııanyń munaı-gaz sektoryna qatysty saıasaty Qazaqstannyń ustanymyna óte uqsas - Hege Marı Norheım hanym
TANA. 5 qazan. QazAqparat - Bul kúnderi Astananyń Táýelsizdik saraıynda ótip jatqan KAZENERGY VI Eýrazııalyq forýmy aıasynda «Statoıl» kompanııasynyń klımat máseleleri jónindegi aǵa vıtse-prezıdenti Hege Marı Norheım «Engergetıkalyq aqıqat jáne klımattyń ózgerýi: alǵa jyljýdyń turaqty joly» taqyrybynda baıandama jasady. Sessııa aıaqtalǵan soń Norheım hanym pm.kz saıtyna arnaıy suhbat berdi.
- Siz Norvegııanyń iri munaı-gaz kompanııalarynyń biriniń ókilisiz. Sizderdiń elderińizde munaı ındýstrııasyn damytýda osyndaı zor tabysqa qalaı qol jetkizilgenin aıtyp ótseńiz.
- Aldymen, barlyq qazaqstandyqtardy Táýelsizdiktiń 20 jyldyq mereıtoıymen quttyqtaǵym keledi. Bul el tarıhyndaǵy óte mańyzdy beles dep oılaımyn.
Norvegııanyń munaı-gaz sektoryna qatysty saıasaty Qazaqstannyń ustanymyna óte uqsas. Munaı-gaz ónerkásibin damytýdy biz aldymen áleýmettik salany jaqsartý tásilderiniń biri retinde qarastyrdyq. Óıtkeni, ońtaıly áleýmettik ahýaldy saqtaı otyryp, biz keleshek urpaǵymyzdyń jaıly turmys-tirshiligine kepildik bere alamyz. Meniń oıymsha, eki eldiń munaı ındýstrııasyn damytýda kózqarasy ortaq.
Biz Qazaqstanmen ken oryndaryn ıgerý salasyndaǵy tehnologııalarmen bólise alar edik dep oılaımyn. Norvegııanyń ekologııalyq turǵydan qaýipsiz tásilderdi paıdalanýda baı tájirıbesi bar.
- Siz ekologııalyq qaýipsizdik máselesin qozǵadyńyz. Qazirgi energetıka salasynyń qorshaǵan ortaǵa áserin qalaı tómendetýge bolady dep esepteısiz?
- Naqty bir eldegi qorshaǵan ortaǵa toqtalar bolsaq, bul jerde úkimet qatań talaptar bekitip, sonymen bir mezgilde salalyq kompanııalarmen jáne kásiptik odaqtarmen yntymaqtastyq ornatqany mańyzdy der edim.
Meniń pikirimshe, Norvegııanyń mańyzdy erekshelikteriniń biri bul salalyq kompanııalar men bıliktiń arasyndaǵy tyǵyz qarym-qatynas. Bul degenimiz - úkimet qatań talaptar bekitip, al kompanııalar úkimetke osy talaptardy qalaı oryndaıtynyn kórsetedi degen sóz. Eger klımattyń ózgerýi sekildi ǵalamdyq máselege keler bolsaq, bul jerde munaı-gaz salasy osy máseleni sheshýge septigin tıgizedi dep oılaımyn. Al, Qazaqstan ózge elderge energoresýrstardy tasymaldaý, olardy paıdalaný jáne monetızatsııalaý arqyly óz úlesin qosa alady. Sonymen qatar, Qazaqstan ekonomıkasyn damytýdyń mańyzdy bóligi bolyp tabylatyn energotıimdilikti arttyrý máselesinde de jumys isteý qajet.
