Norvegııanyń Ferde qalasynda aýyr atletıkadan Eýropa chempıonaty ótýde
ASTANA. QazAqparat - Osy kúnderi Norvegııanyń Ferde qalasynda aýyr atletıkadan Eýropa chempıonaty ótýde. Kári qurlyqtaǵy báseke 10 sáýir kúni bastaldy. Alǵashqy kúni 48 keli salmaqtaǵy áıelder, 56 keli salmaqtaǵy erler synǵa tústi. Keshe 53 kelige deıingi áıelder men 62 kelige deıingi erler ózara myqtylardy anyqtady. Eki kúnniń nátıjesi boıynsha qos sportshysy bas júldege ıe bolǵan Túrkııa ázirge medaldar sany boıynsha kósh bastap tur.
Al búgin áıelder 58 keli salmaq boıynsha synǵa tússe, erler arasynda 69 kelige deıingi jeńimpaz ben júldegerler anyqtalatyn bolady. Áıelder arasyndaǵy tartysty básekeler kún saıyn Astana ýaqytymen 20-30-da bastalady. Al erler Astana ýaqytymen 23-30-da kúsh synasady.
«Eýrosport» telearnasy aýyr atletıkadan Eýropa chempıonatyn kún saıyn tikeleı efırde kórsetýde.
Erteń, 13 sáýir kúni, 63 kelige deıingi áıelder, 77 kelige deıingi erler baq synaıdy. 14 sáýir kúni áıelder 69 kelide, erler 85 kelide synǵa túsedi. 15 sáýir, juma kúni, 75 kelige deıingi áıelder, 94 kelige deıingi erler arasyndaǵy Eýropa chempıony belgili bolmaq. Al 16 sáýir, senbi kúni, qorytyndy jarystar ótedi. Eýropa chempıonatynyń sońǵy kúninde Astana ýaqytymen saǵat 15-15-te 105 kelige deıingi erler arasynda kim myqty ekeni aıqyndalmaq. 18-30-da 75 keliden joǵary salmaqtaǵy áıelder kúsh synassa, saǵat 21-00-de 105 keliden joǵary salmaqtaǵy alyptar jarys aptasyn qorytyndylaıtyn bolady.
Aýyr atletıkada álemdik jáne halyqaralyq deńgeıde jeńimpaz atanyp júrgen sportshylary bar Qazaqstan úshin Eýropa qurlyǵynda ótip jatqan jarystyń da mańyzy zor. Bıyl 5 - 21 tamyz kúnderi Brazılııanyń Rıo-de-Janeıro qalasynda HHHІ Olımpıada oıyndary ótetini belgili. Endeshe, qazir qazaq sportshylarynyń jahandyq dodada Eýropa qurlyǵy boıynsha basty qarsylastary kimder ekenine nazar aýdarýǵa múmkindik týyp tur.
