«Norvegııanyń Arktıka jarysy»: Lýtsenko márege úshinshi bolyp jetti
NUR-SULTAN. QazAqparat – Alekseı Lýtsenko bastaǵan «Astana» velokomandasy «Norvegııanyń Arktıka jarysynyń» eń qıyn kezeńin jaqsy nátıjemen aıaqtady, dep habarlaıdy QazAqparat Olympic.kz saıtyna silteme jasap.
Arktıka jarysynyń «Koroldik kezeń» dep atalatyn osy bóligi Norvegııanyń Nýrlann oblysyndaǵy (fıýlke) Melbý eldi mekeniniń janyndaǵy bıik Storheııa taýynyń ushar basynda aıaqtaldy.
Jarystyń bıik shyńǵa órmelegen sońǵy bóliginde Alekseı Lýtsenko jaqsy daıyndalǵanyn kórsete bildi. Sóıtip, jarys jolynyń oı-qyryn jaqsy biletin jergilikti veloshabandoz Odd Krıstıan Aıkıng jáne frantsııalyq Varren Bargıdiń izin ala márege úshinshi bolyp jetti.
«Sońǵy kóterilý qıynǵa soqty. Men sońyna deıin kúrestim. Úshinshi bolyp kelsem de, ókinbeımin, óıtkeni qolymnan kelgenniń bárin istedim. Búkil komandaǵa alǵys aıtamyn, jigitter men úshin kóp eńbek etti», - deıdi Alekseı Lýtsenko.
Jalpy jarystyń aıaqtalýyna bir kezeń qaldy. Qazir bas kvalıfıkatsııada Varren Bargıı kósh bastap tur, al ekinshi oryndaǵy Alekseı Lýtsenko odan úsh-aq sekýnd artta keledi. «Astananyń» basqa músheleri Ýgo Ýl besinshi (+0.30), al Magnýs Kort altynshy (+0.35) orynda.
