Norvegııany fashısterden azat etýge qatysqan 66 qazaqstandyqtyń esimi belgili boldy

OSLO. QazAqparat - Elimizdiń Norvegııadaǵy elshiligi Skandınav elin azat etý jolynda mert bolǵan 66 qazaqstandyq sarbazdyń esimin anyqtady, dep habarlaıdy QazAqparat Qazaqstan ulttyq arnasyna silteme jasap.

Olar birneshe atqyshtar dıvızııasynyń jáne 69, 72-teńiz atqyshtar brıgadasynyń quramynda soǵysyp, Petsamo-Kırkenes operatsııasynda ajal qushqan.

Sondaı-aq dıplomattar Soltústik flottaǵy shaıqas kezinde erlikpen qaza tapqan 10 qazaqstandyq teńiz jaıaý áskeri, joıǵysh-ushqyshtyń jerlengen jerin tapty.

Jalpy, Norvegııany fashısterden qorǵaý kezinde 13 myń Keńes jaýyngeri mert bolǵan. Oslodaǵy zıratta batyrlardyń qurmetine arnaıy eskertkish qoıylǵan.

Sol eskertkishke kóppen birge Qazaqstannyń Norvegııadaǵy elshisi Erkin Ahynjanov ta gúl shoqtaryn qoıyp, batyrlardyń rýhyna taǵzym etti.

Elshilik ujymy Norvegııadaǵy shaıqasta, tutqyndar lagerinde qaza bolǵan jerlesterimizdiń esimin anyqtaý jumystaryn jalǵastyra bermek.