Norvegııalyq saıahatshy Balqash kólin shańǵymen kesip ótti
ALMATY. QazAqparat - Norvegııalyq saıahatshy Ýılıam Bıholt betin muz basqan Balqash kóliniń ústin shańǵymen 23 kúnde kesip ótti, dep habarlaıdy QazAqparat tilshisi.
Onyń Qazaqstanǵa saparyna Qazaq geografııa qoǵamy demeýshilik jasady. Qoǵam qyzmetkerleri Ýılıamge qajet jerde tehnıkalyq nemese aqparattyq qoldaý kórsetip otyrdy.
Olar jıhankezben jerserik baılanysy bar telefony arqyly únemi habarlasyp otyrǵan.
Saıahatshynyń ózi Qazaqstanǵa kelýdi jarty jyldan beri josparlaǵan. Saparyn bastamas buryn aqparat izdegende, Balqash kólin buryn-sońdy shańǵymen eshkim kesip ótpegenin anyqtaǵan.
«Qazaq geografııa qoǵamymen baılanysqa shyqtym. Olar aqparat tabýyma kómektesti. Bul men úshin óte qyzyq tájirıbe boldy. Kúnderim bir-birine uqsamady. Bul jaı ǵana kól emes. Qaınaǵan tirshilik ortasy eken. Men qasqyrlardyń izin kórdim. Balyqshylarmen tanystym», - dedi saıahatshy.
Ýılıam Bıholt Balqashqa shańǵysymen qatar, muzda taımaıtyn arnaıy aıaq kıim alyp shyqqan.
«Qazaq geografııa qoǵamy» qoǵamdyq uıymynyń jobalar boıynsha menedjeri Maǵjan Saǵymbaevtyń aıtýynsha, ekspedıtsııa barysynda eń qıyny sportshyny kólge sheıin jetkizý bolǵan. Sebebi kóldiń ózine sheıin tike baratyn jol salynbaǵan.
«Jol boıynda ol birde bir eldimekenge soqpady, dúkenderge kirmedi. Sýdyń da, azyǵynyń da da qoryn tolyqtyrmaǵan. Oqys jaǵdaıdan saqtaný úshin onymen spýtnık baılanysy arqyly habarlasyp otyrdyq», - dedi Maǵjan Saǵymbaev.
Norveg sportshysy 2010 jyldan bastap ekstremaldy saıahatpen aınalysyp keledi. Ol álemniń 79 elinde bolǵan. Kóbinese adam aıaǵy baspaǵan beıtanys jerlerge sapar shekkendi unatady.
Eske sala ketsek, norvegııalyq saıahatshynyń shańǵymen Balqash kóliniń muz, qar basqan 570 shaqyrymyn kesip ótý jónindegi ekspedısııanyń bir kúni jaıly buǵan deıin jazǵan bolatynbyz.
Qazaq geografııalyq qoǵamynyń habarlaýynsha, Ýılıam Bıholt táýelsiz Qazaqstannyń tarıhynda alǵash ret jalǵyz ózi Balqashty shańǵymen kesip ótken adam boldy.
