Norvegııalyq «Raýshangúl saraıynda» qazaq óneri tanystyryldy
«Raýshangúl saraıy» (Roseslottet) áıgili sýretshi Vebern Sand 2020 jyly ashqan kórkem jáne oqý kesheni bolyp tabylady. Bul joba Ekinshi dúnıejúzilik soǵys kezinde Norvegııanyń jaýlap alynǵany týraly este saqtaýdy nyǵaıtýǵa jáne de demokratııa, gýmanızm men quqyqtyq memlekettiń qundylyqtaryn nasıhattaýǵa baǵyttalǵan.
Joba jetekshileriniń shaqyrýymen Qazaqstan Elshiligi Oslo turǵyndary men qonaqtaryna arnap mádenı qoıylym uıymdastyrdy. Almagúl Qalelova bastaǵan norveg-qazaq mádenı ortalyǵynyń músheleri «Qosbasqan» men «Aqqýymsyń» atty qazaq bılerin usyndy. Joǵary synyp oqýshysy Qýanysh Tóken «Egiz-Lebiz» ánin oryndady. Norvegııalyq kórermenderge án avtorlary - kompozıtor Jumaǵul Qydyrálıev pen aqyn Israıl Saparbaıdan arnaıy sálem jetkizildi. Qazaqı materıaldyq ónerdiń úlgisi retinde qonaqtardyń nazary dıplomattardyń jubaılary toqyǵan «Quraq kórpege» tartyldy.
Osymen qatar, qonaqtardyń aldynda Abaı Qunanbaıulynyń Qara sózderi men tańdamaly poezııasynyń shyǵarmalary norveg tilindegi aýdarmalarynyń baspageri jáne redaktory Oshıld Kúlos sóz sóılep, Uly aqynnyń birqatar óleńderin oqyp berdi.
Іs-shara barysynda sóz aıtqan Elshi Erkin Ahınjanov pandemııanyń tez arada aıaqtalýyna jáne Qazaqstannyń tanymaly óner sheberleriniń Norvegııada, sondaı-aq norvegııalyq oryndaýshylardyń qoıylymdaryn Qazaqstanda uıymdastyrylýyna úmit artty.
Qazaqstan Elshiligi men «Raýshangúl saraıy» sońǵy jylda tyǵyz yntymaqtastyqta bolyp otyrdy. Keshen qonaqtaryna Ekinshi dúnıejúzilik soǵys kezinde Norvegııanyń soltústigin azat etýge qazaqstandyq jaýyngerlerdiń qatysqany jáne lagerlerde tutqynda bolǵany týraly aıtyldy. Vzvod komandıri Muqash Safarǵalıev, sarbazdar Ǵanı Qyshmetov, Temirbek Keńebaev jáne Imanzada Qabaqov týraly jeke áńgimeler qyzyǵýshylyq týdyrdy.
«Qazaqstan Elshiligin jáne Norveg-qazaq mádenı ortalyǵyn Raýshangúl saraıynda qarsy alý biz úshin úlken qýanysh. Bizdiń keshende «Sovettik orys munarasy» ınstallıatsııasy bar. Bul músin fashıstik rejım kezinde ómirin qıǵan jáne Norvegııada ınfraqurylym salǵan Keńes Odaǵynyń barlyq tutqyndaryna arnalǵan eskertkish. Olar avto-, temirjol jáne basqa da qurylys nysandarynda aýyr jumys istedi. Kóptegen adamdar sol soǵys jyldary qaza tapty. Aralarynda qazaqtar bolǵan. Tiri qalǵandar da boldy, tipti keıbireýi Norvegııada qalyp, otbasyn qurdy... Búgin biz Qazaqstannyń biregeı mádenıetin ashyp kórsetýge, ony nasıhattaýǵa múmkindik alǵanymyzǵa óte qýanyshtymyz. Raýshangúl saraıyna qosh keldińizder!», - dedi áıgili dırıjer jáne keshenniń mýzykalyq jetekshi Martın Romberg.
