Norvegııalyq dárigerler koronavırýspen kúreske kómektesý úshin Italııaǵa attanady
OSLO-RIM. QazAqparat – Norvegııalyq dárigerler koronavırýspen kúresip jatqan ıtalııalyq áriptesterine kómektesý úshin Italııaǵa attanady, dep habarlaıdy QazAqparattyń menshikti tilshisi.
Norvegııanyń densaýlyq saqtaý mınıstri Bent Hoıeniń aıtýynsha, qazirgi tańda Italııanyń soltústigindegi Lombardııa aımaǵynda medıtsınalyq qyzmetkerler óte tapshy.
«Biz Norvegııadaǵy jaǵdaıdy baqylaýda ustap otyrmyz. Al Italııada koronavırýs keń tarap, órship ketti. Sondyqtan dál qazir úlken qıyndyqqa tap bolǵan elge qol ushyn sozýymyz kerek»,- dep túsindirdi ol Norvegııa úkimetiniń sheshimin.
Norvegııadan Italııaǵa attanatyn 25 adamnan turatyn delegatsııa quramynda medbıkeler, dárigerler jáne medıtsınalyq logıstıka mamandary bolady. Olar Apennın túbeginde 4 apta boıy qyzmet etedi.
«Eýropadaǵy yntymaqtastyq pen nıettestik – bos sóz emes. Qazir biz ony is júzinde kórsetip otyrmyz. Biz Italııaǵa jiberip otyrǵan dál osyndaı medıtsınalyq komanda ótken jyly ebola aýrýy araǵanda Kongo Respýblıkasynda jáne qyzylsha órshigende Samoda kóp kómektesti. Bizdiń usynysymyzdy ıtalııalyqtar qýana qoldady», - deıdi Norvegııanyń syrtqy ister mınıstri Ine Soreıde.
Avtor: Іlııas Omarov
