Norvegııalyq bıznes Qazaqstanmen uzaqmerzimdi seriktestikti nyǵaıtqysy keledi
ASTANA. KAZINFORM — Norvegııa Qazaqstanmen uzaqmerzimdi yntymaqtastyqty nyǵaıtýǵa nıetti. Bul týraly Astanada ótken Qazaqstan-Norvegııa Іskerlik keńesiniń ekinshi otyrysynda Norvegııanyń Shyǵys saýda-ónerkásip palatasy dırektorlar keńesiniń tóraǵasy Ronnı Solberg málimdedi.
Onyń aıtýynsha, sońy jyldary norvegııalyq bıznestiń Qazaqstanǵa qyzyǵýshylyǵy artyp keledi, al taraptar arasyndaǵy yntymaqtastyq birtindep praktıkalyq deńgeıge kóshýde.
— Biz Qazaqstanǵa kóp jyldan beri qyzyǵýshylyq tanytyp kelemiz. Eldiń bıznes sektoryna da burynnan nazar aýdara bastadyq. 2024 jyly Osloda ótken bıznes-keńeste ózara túsinistik týraly memorandýmǵa qol qoıyldy, al 2025 jyly jańa kezdesýler men delegatsııa saparlary uıymdastyryldy. Bizdiń palatanyń yntymaqtastyqqa qatysty uzaqmerzimdi josparlary bar jáne bul — Norvegııa men Qazaqstan arasyndaǵy iskerlik qatynastardyń damýynyń bastamasy ǵana, — dedi R. Solberg elordada ótken Qazaqstan-Norvegııa Іskerlik keńesiniń ekinshi otyrysynda.
Sonymen birge, spıker norvegııalyq delegatsııanyń Almaty men Astana qalalaryna baryp, qazaqstandyq bıznes ókilderimen jáne memlekettik qurylymdarmen birqatar kezdesýler ótkizgenin aıtty.
— Bul meniń Qazaqstanǵa alǵashqy saparym jáne elińizge qatty tánti boldym. Shyn máninde, bári men kútkennen de jaqsy bolyp shyqty. Men Shyǵys Eýropanyń kóptegen elderinde boldym, biraq Qazaqstan óte taza, uqypty ári asa qonaqjaı memleket ekenin aıta alamyn. Almatyda da, Astanada da ótken barlyq kezdesýler óte jyly ári nátıjeli ótti. Biz osy oń yntymaqtastyqty jalǵastyryp, mundaı saparlardy jaqsy dástúrge aınaldyrǵymyz keledi. Bul elderimizdiń bıznesi arasyndaǵy baılanysty odan ári nyǵaıtýǵa múmkindik beredi, — dep atap ótti Norvegııanyń Shyǵys saýda-ónerkásip palatasynyń basshysy.
Norvegııalyq palata ókili iskerlik qarym-qatynastyń eki baǵytta da turaqty damýy qajettigin basa aıtty.
— Biz munda norvegııalyq bıznesti damytý úshin ǵana kelgen joqpyz. Sizderdiń elińizden, bıznesterińizden jańa nárse úırengimiz keledi. Qazaqstandyq bıznestiń Norvegııada, al norvegııalyq bıznestiń sizderdiń elderińizde órkendegenin kórgimiz keledi. Biz oń yntymaqtastyǵymyzdyń jalǵasatynyna senemiz, — dedi Ronnı Solberg.
Kezdesýde akvasharýashylyq jáne balyq ónimderin óńdeý salasyndaǵy yntymaqtastyqty odan ári damytýǵa baǵyttalǵan «Organic Fish» JShS men norvegııalyq «Optimar» kompanııasy arasynda ózara túsinistik týraly memorandýmǵa qol qoıyldy.
Resmı statıstıkalyq derekterge sáıkes, 2025 jyldyń qańtar-jeltoqsan aılarynda Qazaqstan men Norvegııa arasyndaǵy ózara saýda kólemi 169,2 mıllıon dollarǵa jetken. Onyń ishinde eksport — 7,8 mıllıon dollar, ımport — 161,3 mıllıon dollar. Bul aldyńǵy jyldyń osy kezeńimen salystyrǵanda 37,5%-ǵa joǵary.
Atalǵan kezeńde Qazaqstannan Norvegııaǵa eksporttalǵan negizgi taýarlar qatarynda bıdaı, burǵylaý nemese qazý mashınalarynyń bólshekteri, elektr tizbekterine arnalǵan aldyn ala qurastyrylǵan elementter jáne basqa da ónimder boldy.
Al Norvegııadan Qazaqstanǵa ımporttalǵan negizgi taýarlar — balyq jáne balyq ónimderi, tıtan kenderi men kontsentrattary, kaltsıı nıtraty men ammonıı nıtratynyń qos tuzdary men qospalary jáne ózge de ónimder.
Aıta keteıik, Astanada Qazaqstan-Norvegııa Іskerlik keńesiniń ekinshi otyrysy ótti. Kezedsýdi Qazaqstannyń Syrtqy saýda palatasy men Norvegııanyń Shyǵys saýda-ónerkásip palatasy uıymdastyrǵan.
