Norvegııadaǵy «Gaýhar lıgasy» kezeńi: Olga Rypakova 14,12 metrge sekirdi
OSLO. QazAqparat - Norvegııa astanasy Oslo qalasynda jeńil atletter arasynda «Gaýhar lıgasy» kezeńi ótti. Jarystyń úsh qarǵyp sekirý baǵdarlamasyna qatysqan qazaqstandyq jeńil atlet Olga Rypakova 14,12 metr nátıjemen 6-oryn ıelendi, dep habarlaıdy QazAqparat.
Jarys jeńimpazy Rıo Olımpıadasynyń chempıony, kolýmbııalyq Katerın Ibargýen (14, 89 metr nátıjesimen) boldy. Ekinshi oryndy amerıkalyq Torı Franklın (14,57 m) ıelendi. Rypakovanyń burynǵy qarsylasy ıamaıkalyq Kımberlı Ýılıams úzdik úshtikti tuıyqtady. Ol 14,5 metr qashyqtyqqa sekirdi.
Rypakova úshin bul bastapqy kezeń. Olga jarystyń aldynda bergen suhbatynda aǵymdaǵy maýsymǵa birtindep «kirip jatqanyn» moıyndap, Osloda ózinen qandaı da bir mańyzdy nátıje kútpeýlerin atap ótken edi. Onyń aıtýynsha, bıyl ol úshin tamyz aıynda Indonezııada ótetin Azıada basty oıyn bolmaq.
Norvegııa astanasynda ótken jarys - «Gaýhar lıganyń» ekinshi kezeńi. Onyń baǵdarlamasyna áıelder arasyndaǵy úsh qarǵyp sekirý kirdi. Rypakovaǵa qoldaý kórsetý úshin Qazaqstan elshiliginiń qyzmetkerleri men qazaqstandyq dıasporanyń ókilderi keldi. «Gaýhar lıganyń» birinshi kezeńi 12 mamyrda Shanhaıda ótti.
