Norvegııada jaǵajaı voleıbolynan «Úlken dýlyǵa» álemdik týrynyń kezeńdik saıysy ótedi
ALMATY. Maýsymnyń 28-i. QazAqparat /Erlik Erjanuly/ - Búgin Aleksandr Dıachenko men Alekseı Sıdorenko jaǵajaı voleıbolynan Norvegııada ótetin Álemdik «Úlken dýlyǵa» týrynyń kezeńdik saıysyna qatysý úshin Almatydan attanyp ketti,
dep habarlaıdy QazAqparat.
Bul baıraqty báseke maýsymnyń 30-y men shildeniń 4-i aralyǵynda Norvegııanyń Stavanger qalasynda ótedi. Onda el namysyn qorǵaıtyn qazaqstandyq jupty jattyqtyrýshy Denıs Rovkın bastap alyp barady. Olar budan soń shildeniń 7-si kúni Shveıtsarııada ótetin kezeńdik saıysqa da qatyspaq.
Jalpy Aleksandr men Alekseı buǵan deıin «Úlken dýlyǵa» álemdik týrynyń Chehııanyń Praga qalasynda ótken jarysyna da qatysqan edi. Onda olar irikteý kezeńinde Belarýs pen Danııa sportshylaryn utyp, úshinshi raýndta reseılikterge ese jibergen bolatyn.
