Norvegııada zeınetke shyǵý jasyn 70 jasqa deıin kóterýge kiristi

ASTANA. KAZINFORM – Norvegııa bıligi 2029 jyldan bastap memlekettik zeınetaqy alý jasyn kezeń-kezeńimen kóterýdi usynyp otyr. Jańa usynysqa sáıkes, zeınetke shyǵý shegi azamattardyń ómir súrý uzaqtyǵynyń artýyna baılanysty ózgerip otyrady, dep habarlaıdy Sınhýa agenttigi.

Norvegııada zeınetke shyǵý jasyn 70 jasqa deıin kóterýge kiristi
Foto: unsplash.com

Usynys boıynsha, qazirgi 67 jastaǵy standartty zeınetke shyǵý jasynyń ornyna ómir súrý uzaqtyǵyna qaraı ulǵaıyp otyratyn kórsetkish engiziledi. Sonymen qatar zeınetaqy alýǵa bolatyn eń tómengi jas ta kóteriledi. Qazir bul kórsetkish 62 jasty quraıdy.

Jańa ózgerister birinshi kezekte 1967 jyly týǵan azamattarǵa áser etedi. Olar úshin zeınetke shyǵý jasyna qatysty shekter shamamen úsh aıǵa ulǵaıady. Al ómir súrý uzaqtyǵyna qatysty qazirgi boljamdar saqtalsa, 1990 jyldardyń sońynda týǵan adamdar standartty zeınetaqyny shamamen 70 jastan bastap ala alady. Zeınetaqyny merziminen buryn alý jasy shamamen 65 jasqa deıin kóterilýi múmkin.

Úkimet uzaq jyldar boıy eńbek etip, zeınetke erte shyǵýǵa májbúr bolǵan azamattarǵa ómir boıy tólenetin qosymsha ústemaqy engizýdi de usynyp otyr. Budan bólek, múgedektigi boıynsha járdemaqy alatyn jáne eń tómengi zeınetaqyǵa kún kóretin adamdardyń tólemderin jaqsartý sharalary qarastyrylǵan.

Usynys boıynsha qoǵamdyq talqylaý 2027 jylǵy 17 aqpanǵa deıin jalǵasady. Úkimet zań jobasyn 2027 jyldyń kókteminde Parlamentke engizýdi josparlap otyr.

Aıta keteıik, buǵan deıin Qazaqstan jyl saıynǵy Marsh jáne CFA Institute ázirleıtin Global Pension Index 2026 jahandyq zeınetaqy ındeksinde 55 eldiń arasynda 64,8 upaımen 29-orynǵa turaqtaǵan edi.

Al zeınetaqy annýıteti boıynsha 63 jasty kútpesten aıyna 200 myń teńge alý úshin ne isteý kerek ekenin myna jerden oqı alasyz.

Sondaı-aq Qazaqstan jahandyq zeınetaqy ındeksinde «ornyqtylyq» reıtıngin saqtap qalǵanyn jazdyq.