Norvegııada soǵystan qalǵan oq-dáriler qylmyskerlerdiń nazaryn aýdaryp otyr

ASTANA. KAZINFORM — Mamandardyń baǵalaýynsha, Soltústik Norvegııanyń tabıǵı aımaqtarynda Ekinshi dúnıejúzilik soǵys kezinen qalǵan jarylmaǵan oq-dárilerdiń mólsheri áli de mıllıon tonnaǵa deıin jetedi, dep jazady AZERTADJ.

Jarylmaı qalǵan bombalar men snarıadtar teńiz túbinde de, qurlyqta da — nemis jáne keńes áskerleri soǵysqan jerlerde, keıde tipti turǵyn úılerge jaqyn mańdarda da jatyr.

Polıtsııa eski snarıadtardaǵy jarylǵysh zat qylmystyq toptardyń qolyna túsýi múmkin dep qaýiptenedi. Qylmyskerlerdiń qyzyǵýshylyǵynyń sebebi — bul zattar áli de qoldanýǵa jaramdy kúıde saqtalǵan. Zertteýshilerdiń aıtýynsha, qazirgi zamanǵy metall izdegishter arqyly snarıadtardy tipti sý astynan da ońaı tabýǵa bolady, sondyqtan olar qaskúnemder úshin qoljetimdi bolady. Buryn Italııada bir qylmystyq top soǵys kezindegi ushaq bombasyn taýyp, ony terakt jasaý úshin paıdalanǵan kórinedi.

Osyndaı oqıǵalar Fınlıandııanyń Laplandııasynda da kezdesedi: eski oq-dáriler ormandar men sý qoımalarynan áli de tabylyp jatyr. Byltyr Rovanıemıde bir azamat ákimshilik ǵımarattaǵy qabyldaý bólimine soǵys kezindegi artıllerııalyq snarıadty ákelgennen keıin, polıtsııa ǵımarattaǵy adamdardy evakýatsııalaýǵa májbúr boldy. Alaıda fın polıtsııasy elde qylmyskerlerdiń mundaı jarylǵysh zattardy maqsatty túrde paıdalanǵan jaǵdaılary tirkelmegenin atap ótedi.

Budan buryn Norvegııada Ekinshi dúnıejúzilik soǵys kezindegi alyp bomba tabylǵanyn jazǵanbyz.