Norvegııada oryn alǵan qaıǵyly jaǵdaı órkenıet álemin, barlyq adamzat ataýlyny dúr silkindirdi - Q. Saýdabaev
TANA. 26 shilde. QazAqparat /Qanat Mámetqazyuly/ - Búgin QR Memlekettik hatshysy Qanat Saýdabaev Qazaqstan Respýblıkasyndaǵy Norvegııa Koroldiginiń elshiliginde bolyp, norvegııa halqyna, lańkestik aktiden qaza bolǵandardyń týystary men jaqyndaryna kóńil aıtty.
Sonymen qatar, Memlekettik hatshy Astanadaǵy elshilikte ashylǵan Norvegııadaǵy teraktiden qaza bolǵandardy eske alý jáne kóńil aıtý kitabyna óziniń kóńilin bildirip, jazba qaldyrdy. «Ótken jumadaǵy Norvegııada oryn alǵan qaıǵyly jaǵdaı órkenıet álemin, barlyq adamzat ataýlyny dúr silkindirdi», - dedi Memlekettik hatshy Norvegııanyń Qazaqstandaǵy elshisi Dag Malmer Halvorsenge.
«Qandaı da bir memleket terrorızmniń ártúrli qubylystarynan tolyǵymen qorǵana almaıdy. Qazaqstan ótken jyldar ishinde osyndaı zulymdyqpen kúres jónindegi halyqaralyq kúshterdiń mańyzdy ári júıeli jaqtaýshysy bolyp keledi. Al qasiret oryn alǵan ýaqytta Elbasy N. Nazarbaev bizdiń elimizge dos memleket bolyp tabylatyn elge búkil qazaqstandyqtardyń kóńilin jetkizip, qaıǵyratynyn bildirdi, Norvegııa koroline qaıǵy-qasiretke ortaqtasyp, kóńil aıtty. Osynaý qıyn kúnderi biz norvegııalyqtarǵa rýhynyń myqty bolǵanyn tileımiz», - dedi Q. Saýdabaev.
