Norvegııada kronprıntsessa Mette-Marıttiń uly qaıtadan ustaldy

ASTANA. KAZINFORM — Norvegııanyń kronprıntsessa Mette-Marıttiń uly Marıýs Borg Heıbı densaýlyqqa qasaqana zııan keltirý, pyshaqpen qorqytý jáne sot belgilegen baılanysqa tyıym salý talabyn buzý kúdigimen qaıtadan ustaldy. Bul týraly 2 aqpanda Oslo polıtsııasy málimdedi, dep habarlaıdy DW.

Ol ózine qatysty basqa aıyptar boıynsha sot otyrysy bastalýyna sanaýly kún qalǵanda ustaldy. Polıtsııa 29 jastaǵy Heıbıdi qaıta qylmys jasaýy múmkin degen qaýipke baılanysty qamaýǵa alý týraly ótinish bermek. Quqyq qorǵaý organdary boljamdy jábirlenýshiler týraly aqparat taratpady.

Heıbıge qatysty sot protsesi Osloda 3 aqpanda bastalyp, aldyn ala málimet boıynsha naýryz aıynyń ortasyna deıin jalǵasady.

Kronprıntsessa uly zorlaý jáne ózge de aýyr qylmystar boıynsha aıyptalyp otyr.

Jalpy aıyptaý aktisi 38 tarmaqtan turady, onyń ishinde tórt zorlaý deregi, sondaı-aq birneshe burynǵy seriktesine qatysty fızıkalyq jáne psıhologııalyq zorlyq kórsetý faktileri bar. Eger onyń qylmysy dáleldense, oǵan 16 jylǵa deıin bas bostandyǵynan aıyrý jazasy qaýpi tónip tur.

Bul — Marıýs Borg Heıbıdiń alǵashqy ret ustalýy emes. Oǵan qatysty tergeý 2024 jyldan beri júrgizilip keledi. Atalǵan janjal Norvegııa koroldik otbasyn qıyn jaǵdaıǵa qaldyrdy. Heıbı koroldik otbasy múshesine jatqyzylǵanymen, hanzada ataǵyna ıe emes jáne koroldik úıdiń resmı múshesi sanalmaıdy.