Norvegııada kóshkin temirjol men tas joldy qıratyp, bir adam joǵalyp ketti

ASTANA. KAZINFORM — Senbi kúni tańerteń Norvegııanyń Tronheım qalasynan soltústik-shyǵysqa qaraı ornalasqan basty E6 magıstralinde joıqyn kóshkin boldy, dep habarlaıdy AZERTADJ.

Agenttiktiń habarlaýynsha, kóshkin saldarynan bir kólik sýǵa túsip ketken. Bir adam qutqarylsa, taǵy biri iz-túzsiz joǵalǵandar qatarynda ekeni aıtyldy.

Polıtsııanyń málimetinshe, joldyń eki jaǵy da tolyqtaı qıraǵan, bul ýchaske birneshe kúnge jabyq bolýy múmkin. Eki turǵyn úı evakýatsııalanyp, taǵy bir ǵımarattyń qıraý qaýpi bar. Sonymen qatar, temirjol da zaqymdanyp, joldyń bir bóligi sý ústinde ilinip qalǵan.

Qutqarýshylardyń aıtýynsha, apatqa «tiri saz» dep atalatyn topyraq sebep bolýy múmkin — ol júkteme túsken kezde turaqtylyǵyn joǵaltyp alatyn kórinedi. Aýdanda kóshkinder áli de jalǵasyp jatyr.

Jeńil kólikter úshin qozǵalys aınalma joldar arqyly uıymdastyrylýy múmkin, alaıda júk kólikteri úshin jaǵdaı kúrdeli bolyp qalyp otyr.

Osyǵan deıin Qytaıdyń ońtústigindegi Gýandýn provıntsııasynda ornalasqan Gýanchjoý qalasynyń Baııýn aýdanynda sársenbi kúni nóser jańbyr saldarynan kóshkin júrip, 14 adam úıindi astynda qalǵanyn jazǵan edik.