Norvegııada kóshkin júrip, qutqarýshylar joǵalyp ketkenderdi izdestirýde
OSLO. QazAqparat –Norvegııalyq Errým kommýnasynda bolǵan iri kóshkinnen keıin 11 adam habar-osharsyz ketti. Aýyldaǵy birneshe úı balshyq qabatynyń astynda qaldy, dep habarlaıdy QazAqparat BBC - ge silteme jasap.
Sársenbi kúngi keshki jaǵdaı boıynsha qutqarýshylar kommýnada joǵalǵan adamdardy tappady, olardyń arasynda balalar da bar. Errým kommýnasy Oslodan 25 km qashyqtyqta ornalasqan, onyń ákimshilik ortalyǵy – Ask eldi mekeni.
Polıtseıler joǵalyp ketkender jer astynda qalýy múmkin dep qaýiptenýde. Kommýnadan 900-ge jýyq adam evakýatsııalandy.
«Biz kóshkin bolǵan aýdanda adamdar bar ekenine senimdimiz, biraq onda joǵalǵan 11 adamnyń barlyǵy bar ma ol jaǵynan habarsyzbyz»,- dedi jergilikti polıtsııa ókili Rodjer Petterson.
Kóshkin sársenbi kúni tańerteń bastaldy. Birneshe jergilikti turǵyn jedel qyzmetterge qońyraý shalyp, úıleri qozǵalyp jatqanyn habarlaǵan.
Norvegııa premer-mınıstri Erna Sýlberg jaǵdaı óte qaýipti ekenin jáne qutqarý jumystary tek tikushaqtan jasalatynyn aıtty.
«Onda adamdar bolýy múmkin... Biraq biz buǵan senimdi emespiz, óıtkeni qazir jańa jyl merekesin qarsy alatyn kez. Ol adamdar ketip qalýy da yqtımal», - dedi ol jýrnalısterge.
«Jer eki ret uzaq ári qatty dirildedi. Men dalany qardan tazalap jatyr dep oıladym», - dedi jergilikti radıoǵa 68 jastaǵy kommýna turǵyny.
Norvegııalyq Sý jáne energoresýrstar dırektoratynyń jergilikti bólimshesiniń basshysy Torıl Hofshagenniń aıtýynsha, kommýna aýdanynda áli de jer qozǵalýda.
Jergilikti basqarý organdary aýdannan shamamen 1500 adamdy evakýatsııalaý qajet bolýy múmkin dep eskertedi.
Dırektorattyń ókili Laıla Hoıvıktiń aıtýynsha, qulaǵan jer qabatynyń mólsheri shamamen 300-den 700 metrge deıin bolǵan. Ol suıytylǵan sazdan qalyptasqan jáne óte tez qulaǵan.
«Eger zardap shekken úıler men evakýatsııalanǵan adamdar sanyn eseptesek, bul – Norvegııadaǵy sońǵy ýaqyttaǵy eń úlken kóshkin», - dep atap ótti ol.
L. Hoıvıktiń aıtýynsha, sol aýdanda jańa kóshkinniń júrýi ekitalaı.
83 jastaǵy Norvegııa koroli Harald V bul apat ony jáne búkil koroldik otbasyn qatty kúızeltti dep málimdedi.
