Norvegııada koronavırýstyń áli kúnge deıin belgisiz mýtatsııasy anyqtaldy
OSLO. QazAqparat – Norvegııanyń Tronheım qalashyǵynda koronavırýstyń áli kúnge deıin belgisiz mýtatsııasy anyqtaldy, dep habarlaıdy QazAqparat The Local Norway-ǵa silteme jasap.
Juma kúni vırýstyń úlgileri taldaý jasaý úshin Tronheımnen Norvegııanyń qoǵamdyq densaýlyq saqtaý ınstıtýtyna (NIPH) joldandy, dep jazady basylym.
Tronheımniń bas dárigeri Týve Resstad qalada anyqtalǵan koronavırýstyń mýtatsııasy Norvegııanyń ózinde anyqtalmaǵan dep sanaıdy.
«Norvegııanyń qoǵamdyq densaýlyq saqtaý ınstıtýty buǵan deıin osyndaı mýtatsııaǵa tap bolǵan joq», - dep málimdedi Resstad Verdens Gang gazetine.
Qazirgi kezde Tronheımde koronavırýs juqtyrýdyń 35 oqıǵasy rastalǵan, taǵy 1500 adam baılanysta bolǵandar retinde karantınde otyr. Demalys kúnderi qalada aýrýǵa shaldyǵýdyń segiz jańa oqıǵasy tirkeldi, sonyń ishinde altaýy jergilikti úsh shaǵyn kásiporyn – Edge shashtarazy, Barmuda bary jáne Lille London pabymen baılanysty.
Resstad koronavırýstyń bul túri basqalaryna qaraǵanda odan da juqpaly ekenine senim joq ekenin atap ótti. Norvegııalyq mamandar úshin sondaı-aq atalǵan mýtatsııanyń taǵy qandaı sıpattamalary bar ekeni belgisiz bolyp otyr.
Resstadtyń aıtýynsha, koronavırýstyń jańa túrin juqtyrý úshin aýyrǵan adammen tyǵyz baılanysta bolý mindetti emes. Ol sondaı-aq adamdardyń vırýstyń bul jańa túrin tez juqtyryp alatynyn qosyp ótti – vırýs ózin basqasha tanytady.
Verdens Gang basylymy Norvegııanyń qoǵamdyq densaýlyq saqtaý ınstıtýtynan vırýstyń jańa mýtatsııasynyń úlgilerin taldaý boıynsha túsinikteme suraǵanyn qosyp ótti.
