Norvegııada endi eki patshaıym bar
ASTANA. KAZINFORM — Norvegııa koroli Harald V qaıtys bolǵannan keıin elde erekshe jaǵdaı qalyptasty. Qazir elde eki patshaıym bar. Jańa monarh Hokonnyń jubaıy Mette-Marıt koroleva ataǵyn aldy, al Haraldtyń jesiri Sonıa óz tıtýlyn saqtap qaldy, dep habarlaıdy AZERTADJ.
Endi korol otbasynyń aldynda resmı mindetterdi bólý máselesi tur. Sebebi eki patshaıymnyń da qazirgi ýaqytta qyzmetin tolyq atqarýǵa múmkindigi joq.
Toqsanǵa taıaǵan Sonıanyń sońǵy jyldary densaýlyǵy syr berip júr. Byltyr qańtarda oǵan kardıostımýlıator ornatylsa, bıyl mamyr aıynda syrqatyna baılanysty aýrýhanaǵa jatqyzyldy.
53 jastaǵy Mette-Marıt maýsym aıynda ókpe transplantatsııasyn jasatyp, áli de uzaq ýaqyt qalpyna kelý kezeńinen ótip jatyr. Ol buǵan deıin múmkindiginshe jubaıyna qoldaý kórsetip, koroldik jup quramyndaǵy mindetterin atqaratynyn aıtqan.
Korol otbasyna túsetin salmaqty taq murageri Ingrıd Aleksandra men hanzada Sverre Magnýstyń ázirge shetelde oqýyn jalǵastyryp jatqany da arttyryp otyr. Sonymen qatar ótken aptada korol Haraldtyń qaryndasy, 94 jastaǵy hanshaıym Astrıd qaıtys boldy. Ol sońǵy jyldaryna deıin resmı mindetterin belsendi atqaryp kelgen.
Sonymen birge korol Harald qaıtys bolǵannan keıin norvegııalyqtardyń Mette-Marıtke degen senimi aıtarlyqtaı artqan. Saýalnamaǵa sáıkes, kóktemde respondentterdiń nebári 22%-y ony bul rólge laıyq dep sanasa, qazir bul kórsetkish 47%-ǵa jetken.
Norvegııada eki patshaıymnyń arasyndaǵy erekshe qarym-qatynasqa da nazar aýdarylyp otyr. Sonıany Mette-Marıtke úlgi ári tálimger retinde sıpattaıdy. Al korol Haraldpen qoshtasý rásiminde eki patshaıym onyń tabytyn qol ustasyp birge shyǵaryp salǵan.
Aıta keteıik, bıyl tamyzdyń sońynda Hokon VIII Norvegııanyń jańa koroli atanǵan bolatyn.
