Norvegııada Ekinshi dúnıejúzilik soǵys kezindegi alyp bomba tabyldy

ASTANA. KAZINFORM — Norvegııanyń Elverým qalasynda Ekinshi dúnıejúzilik soǵys kezinde jarylmaǵan avıatsııalyq bomba anyqtaldy, dep jazady AZERTADJ. 

Qazir ony zalalsyzdandyrý boıynsha operatsııa júrgizilip jatyr.

AZERTADJ málimetinshe, 1940 jyly 11 sáýirde fashıstik Germanııa tastaǵan 250 kelilik bomba Ternıngmoen áskerı polıgonynan tabyldy. Bombanyń jartysy jarylǵysh zattan turatyndyqtan, ári onyń turaqsyz kúıine baılanysty bombany qaýipsiz túrde jyljytý múmkin emes boldy.

— Aıaq astynan jarylyp ketý qaýpi bar. Bombanyń detonatorlary qozǵalysqa, dirilge jáne joǵary temperatýraǵa sezimtal, — deıdi jarylǵysh zattar boıynsha maman Krıs Taarnebıý Maýkeng.

Qaýipti tapsyrmany oryndaý úshin Norvegııa áskerıleri soǵystan qalǵan oq-dárilermen jumys isteýde tájirıbesi mol belgııalyq sarapshylardy tartty.

Qaýipsizdik maqsatynda bomba tabylǵan jerden 250 metr radıýstaǵy turǵyndar evakýatsııalandy. Sondaı-aq bir jarym shaqyrym jer shamasynda turǵandarǵa úıden shyqpaýǵa keńes berildi.