Norvegııada alty jastaǵy bala mektep ekskýrsııasynda vıkıngterdiń semserin taýyp aldy
ASTANA. KAZINFORM - Alty jastaǵy bala jerden shyǵyp turǵan tot basqan temirdi baıqap qalyp, sýyryp alǵan. Keıin onyń vıkıngter dáýirine tıesili kóne semser ekeni anyqtalǵan, dep habarlaıdy BILD.
Henrık Refsnes Mertvedt Oslodan soltústikke qaraı 80 shaqyrym jerdegi Brannbý qalasyndaǵy Fredheim mektebiniń birinshi synybynda oqıdy.
Mektep oqýshylary ekskýrsııa kezinde egis alqabyn aralap júrgen. Sol sátte Henrık jerden shyǵyp turǵan semserdiń sabyna uqsas zatty baıqap qalǵan.
Bala ony tartyp kórgende, uzyndyǵy shamamen 1,3 metr bolatyn bir júzdi kóne semser shyqqan.
Arheologtardyń aıtýynsha, qarý erte vıkıngter dáýirine jatady.
Henrık jergilikti Hadeland gazetine bergen suhbatynda semserdiń syrtqa shyǵyp turǵanyn aıtqan.
— Ol túgeldeı tot basyp, topyraqqa kómilgen. Sondyqtan kóterip kórgim keldi, — deıdi oqýshy.
Oqıǵadan keıin muǵalimder men balalar tabylǵan zat týraly aýdan ákimshiligine habar bergen.
Mamandar semserge shamamen 1300 jyl bolǵanyn málimdedi.
Olardyń boljamynsha, bul jádiger Merovıngter kezeńine nemese vıkıngter dáýiriniń basyna tıesili bolýy múmkin.
Sarapshylar bul óńirdi arheologııalyq turǵyda mańyzdy aımaq dep otyr.
Jýyrda ǵana áýesqoı iz kesýshiler Norvegııadan vıkıngter zamanyndaǵy eń iri kúmis teńge kómbeleriniń birin tapqan bolatyn.
Shamamen bizdiń zamanymyzdyń 1000 jylyna tıesili úsh myń kúmis tıyn Henrık tapqan jerden 170 shaqyrym qashyqtaǵy alqaptan shyqqan.
Qazir kóne semser Oslodaǵy mýzeıge tapsyrylǵan. Mamandar ony tolyq zerttep, keıin kórmege qoıady.
