Norvegııada 15 qazaqstandyq jaýyngerdiń beıiti tabyldy

ASTANA. KAZINFORM — Jedel izdestirý toptarynyń tynymsyz áreketiniń arqasynda qazaqstandyqtardyń soǵys jyldarynda habarsyz ketken ata-babasynyń beıiti tabyldy, dep habarlaıdy Jibek Joly.

Belsendiler jeltoqsan aıynda Pskov qalasynan soǵys jyldaryndaǵy sarbazdardyń súıegin tapqan bolatyn. Jýyrda Norvegııada 15 qazaqstandyq jaýyngerdiń beıiti tabyldy.

Soǵys jyldarynda bir jarym mıllıonǵa jýyq qazaqstandyq maıdanǵa attandy. Ár ekinshi jaýynger soǵysta mert boldy. 270 000-nan astam sarbaz iz-túzsiz joǵalǵandar tizimine endi. Іzdestirý toptarynyń baǵalaýynsha, búginde eki mıllıonǵa jýyq qazaqstandyq ata-babasyna ne bolǵanyn jáne olardyń qaıda jerlengenin bilgisi keledi.

— Jumys barysynda biz resmı veb-saıtymyzda otbasylardan 12 000-nan astam suraý aldyq. Búginge deıin biz 4500-den astam adamnyń taǵdyry men jerlengen jerin anyqtadyq. Jaýyngerler tek burynǵy Keńes Odaǵy aýmaǵynda emes, sonymen qatar Shyǵys Eýropa, Norvegııa, Nıderlandy, tipti Ulybrıtanııadan da tabylyp jatyr, — dedi Atamnyn Amanaty basqarma tóraǵasynyń orynbasary Ábýbákir Smaıylov.

Іzdestirý jumystaryna polıtsııa, ákimdikter jáne jergilikti mektepterdiń muǵalimderinen bastap mınıstrlikter men elshilikterge deıin jumyldyryldy. Soǵysta habar-osharsyz ketkender jappaı beıitterden tabylǵan, olardyń arasynda áskerı tutqyndar da bar. 

— Qujattar óte egjeı-tegjeıli toltyryldy: aty-jóni, tutqynǵa túsken kúni men orny, kóziniń túsine deıin. Árbir kartada fotosýret bar. Bul kóp sarbazdyń alǵashqy jáne sońǵy sýreti bolǵan. Sondyqtan tutqynǵa túskenderdi anyqtaý ońaıǵa tústi, — dedi Ábýbákir Smaıylov.

Jaqynda Norvegııanyń soltústiginde qaza tapqan 15 qazaqstandyq jaýyngerdiń beıiti tabyldy. Olardyń aty-jóni tirkeý kartalarynyń arqasynda anyqtaldy, kópshiliginde fotosýret bar.

Norvegııalyq erikti Tatıana Zatolokına-Toresen izdeý jumystaryna atsalysqan. Birneshe jyl ishinde onyń toby 400-ge jýyq keńestik áskerı tutqyndy tapty.

— Olar 1940 jyldyń 9 sáýirinen bastap okkýpatsııalanǵan Norvegııa aýmaǵynda bolǵan keńes jaýyngerleri. Osy 15 jaýyngerdiń árqaısysy týraly arnaıy bilip, otbasyn taýyp, sarbazdar týraly barlyq aqparatty jetkizgimiz keldi. Meniń oıymsha, ata-babasynyń beıiti qaıda ekenin jáne onyń qalaı mert bolǵany týraly bilý urpaǵyna tynyshtyq syılaıdy, — deıdi norvegııalyq erikti Tatıana Zatolokına-Torezen.

Qazir izdeýshiler Soltústik polıar sheńberiniń ústinde nemis tutqynynda qaza tapqan qazaqstandyq jaýyngerlerdiń otbasylaryn izdestirip jatyr. Bul sarbazdar Norvegııadaǵy Iorstadmoen zıratynda jerlengen. Engeloı lagerindegi tutqyndardyń qaldyqtary Tetta aralynda jerlengen.

Aıta keteıik, byltyr jyl sońyna qaraı Tarazda Ekinshi dúnıejúzilik soǵys ardageri ómirden ozdy.