Norvegııada 12 qazaqstandyq sarbazdyń aty-jóni men jerlengen jeri anyqtaldy

NUR-SULTAN. QazAqparat – Qazaqstannyń Oslodaǵy Elshiligi Ekinshi dúnıejúzilik soǵys kezinde okkýpatsııada bolǵan Norvegııada qaza tapqan qazaqstandyq jaýyngerlerdiń jańartylǵan tizimin jarııalady, dep habarlaıdy QR SІM baspasóz qyzmeti.

Sońǵy aılarda 12 qazaqstandyq sarbazdyń aty-jóni men jerlengen jeri anyqtaldy. Esimderi belgili qazaqstandyq soldattardyń jalpy sany 56 adam.

Tizimde sarbazdyń týǵan jyly men mekeni, áskerge shaqyrý, qyzmet etý, tutqyndalýy, qaıtys bolýy jáne jerlengen jeri, týystary týraly málimetter, sondaı-aq qolda bar qujattarǵa siltemeler berilgen. Tizim «Falstad ortalyǵy» (Norvegııa), Qazaqstan aýmaǵynan shaqyrylyp Uly Otan soǵysy kezinde qaza tapqan nemese habarsyz ketken áskerı qyzmetshiler týraly «Memorıal» derekter banki, sondaı-aq Reseılik «Memorıal» jıyntyq derekter banki sııaqty birneshe derekter kózderinen alynǵan aqparatty salystyrý arqyly jasaldy.

«Falstad ortalyǵy» usynǵan aqparat soldattyń jerlengen orny týraly naqty málimetterimen qundy. Reseılik «Memorıalda» áskerı tutqyndardyń kartotekasy, al qazaqstandyq «Memorıaldyń» málimetteri – Qazaqstandaǵy jaýyngerdiń týǵan jeri men áskerge shaqyrylýy týraly tolyq aqparat bar. Qaza tapqan sarbazdardyń kóbisi bir nemese eki ǵana málimetter bazasynda kórsetilgeni izdeýdi qıyndatady. Kóptegen jaǵdaıda soldat esimi men geografııalyq ataýlardyń burmalanyp jazylýy problemasy da bar.

Elshilik Norvegııada jerlengen qazaqstandyq sarbazdardyń barynsha tolyq tizimin jasaý maqsatynda norvegııalyq «Falstad ortalyǵymen» ózara árekettesýdi jalǵastyrmaq. Búgingi kúnge deıin Norvegııada jerlengen keńestik áskerılerdiń shamamen 15 500 sany týraly belgili bolyp, olardyń 7 804-tiń esimderi anyqtaldy.

Sonymen qatar, Elshilik Norvegııadaǵy qaza tapqan qazaqstandyqtardyń taǵdyry týraly basqa da derekkózderden alǵan. Atap aıtqanda, jýyrda tabylǵan derekkóz boıynsha 1944 jyly 27 maýsymda Kırkenesti bombalaý kezinde 22 qazaqstandyqtyń qazaǵa ushyraýy týraly aqparat zerttelýde.

2020 jyldyń qańtarynda 44 soldattyń alǵashqy tizimi jarııalanǵannan beri tek bir sarbazdyń týysqandary ǵana tabyldy. Elshilik jarııalanǵan aqparat sarbazdardyń urpaqtaryn, týystary men jaqyndaryn tabýǵa kómektesedi, zertteýlerdi odan ári júrgizýge jáne soldattardy máńgi este qaldyrýǵa úles qosady dep úmittenedi.

Fotosýrette: Norvegııanyń Tetta aralyndaǵy Keńestik áskerı zırattaǵy eskertkish.