Norvegııa taq murageriniń uly týraly kitap elde biraz shý shyǵardy

ASTANA. KAZINFORM — Norvegııada 20 qazan kúni murager hanshaıym Mette-Marıttiń uly Marıýs Borg Heıbıge arnalǵan «Aq jolaqtar, qara qoılar» kitaby jaryq kórdi, dep habarlaıdy AZERTADJ. 

Aschehoug baspasy shyǵarǵan kitap birden kópshiliktiń nazaryn aýdardy.

Koroldik saraı bul kitapta jalǵan shaǵymdar men pikirler bar ekenin aıtty. Sondaı-aq polıtsııa kitaptaǵy negizgi epızodtardyń birin kópshilik aldynda joqqa shyǵardy. Onda Heıbı polıtsııanyń baqylaýymen Oslonyń ortalyq kósheleriniń birinde kokaın satty degen málimet bar. Alaıda polıtsııa bul aqparatqa úzildi-kesildi qarsylyq tanytty.

— Bizdiń qyzmetkerler ony esirtkini satyp jatqanyn emes, ózi tutynǵan kúıinde baıqaǵan, — dep habarlady polıtsııanyń baspasóz qyzmeti.

Polıtsııanyń aıtýynsha, Heıbımen sońǵy áńgimelesý onyń esirtki saýdasyna qatysty emes, tyıym salynǵan zatty tutynýy men ómir saltyna baılanysty bolǵan.

Osyǵan qaramastan, Aschehoug baspasy daýly epızodty alyp tastaýdan bas tartyp, óz derekkózine senimdi ekenin jetkizdi. 

Heıbıdiń advokattary jalǵan málimdemeni kitaptan tolyǵymen alyp tastaýdy nemese polıtsııanyń ustanymyna qatysty eskertpe qosýdy talap etti. Baspager bul usynystan bas tartqannan keıin advokattar Oslo aýdandyq sotyna kitapty taratýǵa ýaqytsha tyıym salý týraly ótinish berdi.

Al Marıýs Borg Heıbıdiń ózi qylmystyq is boıynsha aıyptalýshy bolyp qala beredi. Tamyz aıynda oǵan zorlaý, zorlyq-zombylyq jáne qorqytý sııaqty 32 bap boıynsha aıyp taǵyldy. Sot protsesi 2026 jyldyń 3 aqpanynda bastalady jáne shamamen 6 aptaǵa sozylady dep josparlanǵan.

Buǵan deıin Norvegııa kronprıntsessanyń uly zorlyq-zombylyq úshin jaýapqa tartylatyny týraly habarlandy.