Norvegııada Stad túbegi arqyly álemdegi alǵashqy keme tonneli salynady
ASTANA. KAZINFORM — Norvegııa iri teńiz kemelerine arnalǵan álemdegi alǵashqy tonnel bolatyn Stad jobasyn bastaıdy.
Norvegııa jaǵalaý ákimshiliginiń málimetinshe, álemdegi alǵashqy keme júretin tonneldiń qurylysy 2027 jyly bastalmaq.
Jobanyń júzege asýyna tsentrıstik jáne solshyl partııalar arasyndaǵy kelisim yqpal etti. Taraptar tonnel qurylysyn qarjylandyrýdy naqtylanǵan memlekettik bıýdjetke engizýge kelisken.
Eınar Vık Arset basqaratyn Norvegııa jaǵalaý ákimshiliginiń málimetinshe, qurylys jumystaryn kelesi jyldyń basynda bastaý úshin barlyq qajetti rásimder júrgiziledi.
Bas merdigerdi anyqtaý boıynsha konkýrs eki jylǵa jýyq ýaqytqa sozyldy. Sáýir aıynda úsh úmitkerdiń sońǵy usynystary qabyldanyp, ótinimderdi baǵalaý aıaqtaldy. Jeńimpaz jarııalanǵannan keıin nátıjelerge shaǵymdaný merzimi beriledi, sodan soń kelisimshartqa qol qoıylady. Sonymen qatar bılik ınjenerlik jelilerdi kóshirý jáne bolashaq qurylys aımaǵyndaǵy nysandardy buzýǵa qatysty qosymsha kelisimderdi daıyndap jatyr.
Tonnel Norvegııanyń batys jaǵalaýyndaǵy Stad túbeginiń eń tar bóligin kesip ótedi. Ol eki fordty baılanystyryp, kemelerge el jaǵalaýyndaǵy eń kúrdeli ári qaýipti teńiz ýchaskeleriniń birin aınalyp ótýge múmkindik beredi.
Tonneldiń uzyndyǵy 1,7 shaqyrym bolsa, kireberis bólikterimen birge shamamen 2,2 shaqyrymdy quraıdy. Eni 36 metr, bıiktigi 50 metr bolady. Mundaı ólshemder Norvegııanyń jaǵalaý baǵyttarynda qatynaıtyn eń iri jolaýshylar jáne júk kemeleriniń ótýine múmkindik beredi.
Jobanyń basty maqsaty — aýa raıy qubylmaly, qatty jel men jıi daýyl soǵatyn Stad mańyndaǵy teńiz qatynasynyń qaýipsizdigin arttyrý. Tonnel salynǵannan keıin bul aımaqtaǵy keme qatynasy anaǵurlym senimdi ári qaýipsiz bolady.
Aıta keteıik, Norvegııada alty jastaǵy bala mektep ekskýrsııasynda vıkıngterdiń semserin taýyp aldy.
