Norvegııa prokýratýrasy hanshaıymnyń ulyna jeti jyl bas bostandyǵynan aıyrý jazasyn surady
ASTANA.KAZINFORM - Osloda Norvegııa hanshaıymynyń uly Marıýs Borg Heıbıdiń soty aıaqtalyp jatyr, dep habarlaıdy The Guardian.
Norvegııa prokýratýrasy Marıýs Borg Heıbıdiń 39 qylmys jasaǵanyn anyqtap, sonyń ishinde tórt zorlaý, turmystyq zorlyq-zombylyq jáne basqa da birneshe qylmys boıynsha kináli dep tanyp, oǵan jeti jyl jeti aıǵa bas bostandyǵynan aıyrý jazasyn surady.
Aıyptaý tarapy óz málimdemesin 18 naýryzda, Oslo aýdandyq sotynda alty aptadan astam ýaqytqa sozylǵan sot protsesiniń sońǵy kúni jasady.
Prokýratýranyń málimetinshe, Heıbı 40 aıyptyń 39-y boıynsha kináli dep tanyldy. Bir aıyp tyıym salý týraly buıryqty buzý boıynsha alynyp tastaldy.
29 jastaǵy sottalýshy birneshe jeńil qylmys boıynsha kinásin ishinara moıyndady, biraq zorlaý aıyptaryn joqqa shyǵardy.
Sot protsesi Norvegııada da, shetelde de keńinen qoǵam nazaryn aýdardy. Tyńdaý barysynda birneshe jábirlenýshi kýálik berdi, sonyń ishinde Heıbıdiń burynǵy seriktesi, bloger jáne realıtı-shoý juldyzy Nora Haýkland ta bar.
Tyńdaý 19 naýryzda aıaqtalǵannan keıin sot sheshim qabyldaý úshin birneshe aı ýaqyt alady.
Aıyptaý tarapy sonymen qatar qosymsha sharalardy surady: jábirlenýshi dep boljanǵandardyń birimen eki jylǵa baılanysqa tyıym salý, elektrondyq qurylǵylardy tárkileý, sottalýshynyń júrgizýshi kýáligin toqtata turý jáne osyǵan uqsas merzimge kólik júrgizýge tyıym salý, sodan keıin kólik júrgizý emtıhanyn qaıta tapsyrý.
Bul is Norvegııa koroldik otbasyna jasalǵan qysymnyń kúsheıýimen baılanysty. Táj hanshaıymy Mette-Marıt buǵan deıin qarjyger Djeffrı Epshteınmen baılanysta boldy degen daýǵa qalǵan.
Heıbıdiń soty qazirgi Norvegııa tarıhyndaǵy eń tanymal sot isteriniń birine aınaldy.
Aıta keteıik, Marıýs Borg Heıbıdiń koroldik ataǵy joq jáne taqqa eshqandaı quqyǵy joq. Ol hanshaıym Mette-Marıttiń 2001 jyly Norvegııanyń bolashaq koroli, táj hanzadasy Hoakonǵa turmysqa shyqqanǵa deıingi qarym-qatynasynan týǵan uly.
Osloda ótken osy jyldyń 3 aqpanynda ótken alǵashqy sot otyrysynda Heıbı zorlaý aıyptary boıynsha kinásin moıyndamady. Ol sot otyrysyna túrli-tústi kıimmen keldi jáne aıyptaý kezinde aıtarlyqtaı reaktsııa tanytpady.
Osyǵan deıin Norvegııada kronprıntsessa Mette-Marıttiń uly qaıtadan ustalǵany týraly jazdyq.
