Norvegııa men Shvetsııa sırek kezdesetin aqmańdaı qaz úshin kelise almaı jatyr

ASTANA. KAZINFORM — Norvegııa men Shvetsııa arasynda sırek kezdesetin aqmańdaı qazdy saqtaý máselesine baılanysty daý týyndady, dep jazady AZERTADJ.

Shvetsııa 1970-jyldardyń sońynan beri Reseıden qustardy ákelip, olardy ósirip, keıin jabaıy tabıǵatqa jiberý arqyly osy qustyń sanyn arttyrýǵa baǵyttalǵan qymbat jobany júrgizip keledi.

Al Norvegııa bul máselege neǵurlym passıvti tásilmen qaraıdy. Keı jaǵdaılarda shekaradan ushyp ótken shved qazdaryn atyp tastaǵan oqıǵalar da bolǵan. Jergilikti bılik bul qustardy «jasandy» dep sanap, olardyń aralasýy tarıhı kóshi-qon baǵyttaryn ózgertip jiberedi dep qaýiptenedi.

Ańshylar qaýymdastyǵy bul áreketke qarsy.

— Olar shved qazyn nege qaýip dep sanaıtynyn túsinbeı otyrmyz: ol norvegııalyq toppen birge kóshedi. Joıylyp bara jatqan túr ókilin ǵylymı negizsiz joıý — halyqaralyq kelisimderge qaıshy, — deıdi uıym ókilderi.

Sondaı-aq olar shved qazdary norvegııalyqtarǵa qaraǵanda qaýipsiz kóshi-qon joldaryn paıdalanatynyn atap ótedi.

Norvegııalyq aqmańdaı qazdar Reseı men Qazaqstan arqyly Grekııaǵa ushady, al Shvetsııa 1980-jyldary óz qustarynyń baǵyttaryn ózgertip, Germanııa men Nıderlandy arqyly ótkizýdi bastaǵan.

— Shved popýlıatsııasy Fınlıandııa, Estonııa, Majarstan jáne Grekııamen ortaq jabaıy popýlıatsııamyzǵa qaýip tóndiredi. Jasandy popýlıatsııamen aralasý jáne tarıhı kóshi-qon jolynyń buzylýy — múlde qabyldaýǵa bolmaıtyn jaǵdaı jáne halyqaralyq usynystarǵa qaıshy keledi, — dep málimdedi norvegııa tarapy.

Budan buryn japondyq alyp ýstrıtsa Shvetsııa jaǵalaýyna jaıylyp jatqanyn jazǵanbyz.