Norvegııa maýsymda COVID-19-ǵa qarsy vaktsınalaý qujatyn engizedi
BRıÝSSELЬ-OSLO. QazAqparat – Norvegııanyń Premer-mınıstri Erna Solberg el ishindegi karantın shekteýlerin jeńildetý úshin bıylǵy maýsym aıynda skandınavııalyq memleket vaktsınalaý qujatyn qoldanýdy bastaıtynyn aıtty, dep habarlaıdy «QazAqparat» HAA menshikti tilshisi.
Erna Solbergtiń aıtýynsha, sertıfıkat onyń ıesi vaktsına alǵan-almaǵany, sondaı-aq buryn koronavırýspen aýyrǵan-aýyrmaǵany týraly málimetterdi qamtıdy.
«Bul sertıfıkattar bizdiń qoǵamdy tezirek jáne erterek ashýǵa múmkindik beredi», - dep atap ótti premer-mınıstr. Norvegııa Eýropalyq Odaqqa múshe emes, biraq Eýropalyq biryńǵaı naryq pen Shengen týrıstik aımaǵynda bar.
Sertıfıkat EO-nyń barlyq standarttaryna sáıkes keledi jáne shetelge sapar shegý úshin qoldanylady.
Pandemııa bastalǵannan beri Eýropada aýrý juqtyrý men ólim-jitim jaǵdaılarynyń eń tómen deńgeıleriniń biri Norvegııada boldy. Biraq naýryz aıynda koronavırýs saldarynan aýrýhanaǵa jatqyzylǵandar sany tez óskennen keıin qatań sharalar qoldanyldy.
2021 jylǵy 5 mamyrdaǵy jaǵdaı boıynsha Norvegııa turǵyndarynyń 31,7% - y koronavırýsqa qarsy alǵashqy ekpeni aldy, al 8,4% - y tolyq vaktsınalaýdan ótti .
Avtor: Arnur Rahymbekov
