Norvegııa kronprıntsessanyń uly zorlaý jáne turmystyq zorlyq úshin jaýapqa tartylmaq

ASTANA. KAZINFORM — Jyl boıy júrgizilgen polıtsııa tergeýinen keıin Norvegııa kronprıntsessynyń uly aýyr qylmystarǵa aıyptalyp otyr. Bul týraly dúısenbi kúni prokýror málimdedi, dep habarlaıdy Reuters.

28 jastaǵy Marıýs Borg Heıbı — kronprıntsessa Mette-Marıttiń uly jáne kronprınts Hokonnyń ógeı balasy — aldaǵy jyldyń basynda sot aldynda jaýap beredi. Prokýrordyń aıtýynsha, eger ol eń aýyr aıyptar boıynsha kináli dep tanylsa, 10 jylǵa deıin bas bostandyǵynan aıyrylýy múmkin.

Heıbı zorlaý men turmystyq zorlyq-zombylyq boıynsha negizgi aıyptaýlardy joqqa shyǵaryp otyr, alaıda advokatynyń málimdeýinshe, sot protsesi bastalǵanda keıbir jeńil aıyptar boıynsha kinásin moıyndaýǵa daıyn.

— Ol zorlaý men turmystyq zorlyqqa qatysty aıyptaýlarmen kelispeıdi, — dedi onyń advokaty Reuters agenttigine.

Norvegııa koroldik saraıynyń málimdemesinde bul isti sot qarap, sheshim qabyldaýy tıis ekeni aıtylǵan.

Reuters dereginshe, 2024 jyldyń qarashasynda polıtsııa Heıbıdi bir aptaǵa qamaýǵa alǵan.

Oǵan dúısenbi kúni 32 qylmystyq is boıynsha aıyp taǵyldy, onyń ishinde tórt zorlaý deregi bar.

2024 jyldyń tamyzynda polıtsııa Heıbıdi jaqyn qarym-qatynasta bolǵan áıeldi soqqyǵa jyqqany úshin kúdikti dep tanydy. Ol kezde Heıbı BAQ-qa bergen málimdemesinde kokaın men alkogoldiń áserinde bolyp, áıelge dene jaraqatyn salǵanyn jáne onyń páterin oırandaǵanyn moıyndaǵan.

Aıta keteıik, Marıýs Borg Heıbı — Mette-Marıttiń 2001 jyly kronprınts Hokonmen turmys qurǵanǵa deıingi qarym-qatynasynan týǵan balasy. Onyń koroldik tıtýly da, taqqa talas quqyǵy da joq.

Budan buryn Norvegııa men Shvetsııa arasynda sırek kezdesetin aqmańdaı qazdy saqtaý máselesine baılanysty daý týyndaǵanyn jazǵanbyz.