Norvegııa koroli Harald V qupııa qabirge jerlenedi
ASTANA. KAZINFORM — Norvegııa koroli Harald V 89 jasynda qaıtys boldy. Monarhty jerleý rásiminiń naqty kúni ázirshe jarııalanǵan joq. Alaıda korolmen qoshtasý rásiminiń keıbir mán-jaıy belgili boldy, dep habarlaıdy Kazinform agenttigi AZERTADJ-ǵa silteme jasap.
Basylymnyń málimetinshe, qoshtasý rásimi Oslodaǵy Akershýs qamalynda aıaqtalady. Sol jerde koroldiń denesi salynǵan tabyt jańa sarkofagqa ornalastyrylady. Onyń syrtqy kelbeti ázirshe qupııa saqtalady jáne qabirge alǵash paıdalanylǵannan keıin ǵana kópshilikke kórsetiledi.
Jerleý rásimine shamamen 3 myń áskerı qyzmetker qatysady dep josparlanyp otyr. Rásimdi uıymdastyrýǵa Norvegııa Syrtqy ister mınıstrligi jaýapty.
Áskerı qyzmetshilerdiń qatysýyn Akershýs qamalynyń komendanty, brıgadalyq general Gıýda Ellefsplass Olssen úılestiredi. Ol bul qyzmetti 2024 jyldan beri atqaryp keledi jáne 1653 jyly bul laýazym engizilgeli beri qamaldyń alǵashqy áıel komendanty atandy.
Bolashaqta dál osy qabirge patshaıym Sonıa da jerlenedi.
Jańa qabirdi jasaýǵa Norvegııa úkimeti eki jyl buryn 20 mln kron bólgen. Jobany norvegııalyq Snøhetta sáýlet bıýrosy men professor Ketıl Tredal Torsen ázirlegen.
Harald V kózi tirisinde óziniń bolashaq jerlenetin jeri týraly ázilmen aıtqan.
— Іshi jaqsy qaptalady dep úmittenemin. Jaıly bolǵany jón. Óıtkeni onda biraz ýaqyt jatýǵa týra keledi ǵoı, — degen korol byltyrǵy resmı keshki as kezinde patshaıymǵa qarap.
Monarh qaıtys bolǵan kúni Akershýs qamalynda aza tutý salıýti atyldy. 30 sekýnd aralyqpen 21 ret zeńbirek atylǵan. Norvegııada mundaı rásim keıingi ret 1991 jyly ótkizilgen.
Salıýt kezinde 1905 jyly shved-norveg odaǵy tarar aldynda Shvetsııadan satyp alynǵan zeńbirekter paıdalanyldy. Sol kezde Norvegııa Shvetsııa úkimetinen óz dáýiri úshin zamanaýı sanalǵan 146 zeńbirek satyp alǵan.
Aıta keteıik, Harald V qaıtys bolǵannan keıin korol taǵyna onyń 53 jastaǵy uly, taq murageri Hokon otyrdy. Ol Hokon VIII degen atpen Norvegııa koroli atandy.
Qazaqstan Prezıdenti Qasym-Jomart Toqaev Norvegııa koroli Hokon VIII-ge ákesi, korol Harald V-niń qaıtys bolýyna baılanysty kóńil aıtý jedelhatyn joldady.
