Norvegııa Koroldiginiń taq murageri, hanzada Hokon Magnýs Innovatsııalardy damytý jáne jumysqa ornalasýǵa járdemdesý ortalyǵynda boldy

ASTANA. Aqpannyń 5-i. QazAqparat /Marlan Jıembaı/ - Elimizge issaparmen kelgen Norvegııa Koroldiginiń taq murageri, hanzada Hokon Magnýs búgin elordadaǵy BUU Damý baǵdarlamasy men norvegııalyq SYSLAB jobasynyń qoldaýymen ashylǵan Innovatsııalardy damytý jáne jumysqa ornalasýǵa járdemdesý ortalyǵynda bolyp, onyń jumysymen tanysty.

Ortalyq ornalasqan keńseni aralap kórgen hanzada Hokon Magnýs onda qyzmet isteıtin mamandarmen sóılesip, estelik sýretke tústi. «Sizderdiń jumystaryńyz jemisti bolatynyna meniń senimim mol. Sizderge tek jaqsylyq tileımin», dedi hanzada.

Mártebeli meımandy kútýge Shymkentten arnaıy kelgen joba úılestirýshisi Lázzat Qydyrova mundaı ortalyqtyń Almatydan keıin Ońtústik Qazaqstan oblysynda ashylǵandyǵyn atap ótti. Onyń aıtýynsha, jobanyń negizgi maqsaty - uzaq ýaqyt boıy jumyssyz júrgen joǵary bilimdi mamannyń jumysqa ornalasýyna qol ushyn berý. «Shymkenttegi ortalyqtyń eń basty erekshelegi, ol tek múgedek azamattarǵa ǵana arnalǵan. Qazirgi ýaqytta bizdiń birinshi tobymyz daıyndyǵyn bitirip, onyń 14-i jumysqa ornalasty. Al aqpan aıynyń sońynda ekinshi tobymyz bitirip shyǵady. Olardyń da 80 paıyzy jumysqa shaqyrtý alyp otyr», dedi ol óz sózinde.

Aıta keteıik, SYSLAB jobasy 1992 jyly Norvegııanyń «Hıb-Sıslab» kásiporynynda kishi jáne orta bıznestiń maqsattaryn biriktirý úshin qurylǵan. Jobanyń avtory jáne negizin qalaýshy - Bergen qalasynyń Joǵary tehnologııalar ortalyǵynyń dırektory ıAn Iohonssen. Elimizde atalǵan jobanyń Almaty, Astana jáne Shymkent qalalarynda ortalyqtary bar.