Norvegııa qazaqstandyqtardy Oraza Aıt merekesimen quttyqtady

NUR-SULTAN. QazAqparat - Norvegııadaǵy Qazaqstan elshiligine Norvegııanyń dinı birlestiktermen yntymaqtastyq keńesi atynan Oraza Aıt merekesimen quttyqtaý hat kelip tústi. Hatta beıbit ári qýanyshqa toly merekege oraı qazaqstandyqtarǵa eń jaqsy tilekter joldanǵan, dep habarlaıdy QazAqparat.

«Norvegııada biz Ramazan aıynan keıingi Aıt merekesin atap ótetin musylman baýyrlarymyzǵa jan-jaqty qoldaý bildiremiz», - deıdi hatta Keńes basshysy Ingrıd Rozendorf Djoıs hanym «álemniń túkpir-túkpirinde adamdar áli de konfessııaaralyq dárejede bólinip alyp, qorqynyshtan aryla almaı júrgenin» tilge tıek ete kele.

Sondaı-aq, Norvegııanyń dinı birlestiktermen yntymaqtastyq keńesi dini men ulty basqa bolǵanyna qaramastan, beıbitshilik mádenıeti men toleranttylyqty damytý jolynda, ortaq maqsattarǵa jetý jolynda senim arta alatyn qazaqstandyqtarǵa alǵysyn bildirdi.