Norvegııa hanshaıymynyń uly qamaýǵa alyndy
ASTANA.KAZINFORM - Norvegııa hanshaıymy Mette-Marıttiń uly, 29 jastaǵy Marıýs Borg Heıbı birneshe qylmys, sonyń ishinde eki zorlaý baby boıynsha kináli dep tanylǵannan keıin tórt jylǵa bas bostandyǵynan aıyryldy, dep habarlaıdy The Guardian.
Úkimdi Oslo soty 16 maýsymda, Heıbıdiń úsh aıǵa sozylǵan sot protsesinen keıin shyǵardy.
Norvegııa hanshaıymynyń ulyna 40 aıyp taǵyldy. Onyń ishinde tórt zorlaý jáne shabýyl jasaǵany úshin, birneshe ret tyıym salý týraly buıryqtardy buzǵany, sondaı-aq esirtki men kólik júrgizý qylmystary bar. Keıinirek tyıym salý týraly buıryqty buzý týraly bir aıyp alynyp tastaldy. Heıbı ózine taǵylǵan tórt zorlaýdyń ekeýinde, sondaı-aq aty-jóni jarııalanǵan jalǵyz jábirlenýshi Nora Haýklandqa shabýyl jasaǵany úshin kináli dep tanyldy. Oǵan Haýklandqa jáne taǵy úsh áıelge ótemaqy tóleýge mindetteldi.
Zorlaý aıyptaýlary 2018 jáne 2024 jyldar aralyǵynda bolǵan tórt áıelge qatysty. Tórteýinde de áıelder uıyqtap jatqan nemese qarsylyq bildiretin jaǵdaıda bolmaǵan degen boljam bar.
Marıýs Borg Heıbı eń aýyr aıyptaýlar boıynsha kinásin moıyndamady. Biraq birqatar jeńil aıyptaýdy moıyndady. Ol sot sheshimine shaǵymdana alady.
Sottalýshynyń ózi sot otyrysyna Ila túrmesinen beınebaılanys arqyly qatysty. Onyń qorǵaýshylary bul densaýlyq máselesine baılanysty dep málimdedi.
Sot otyrysy Norvegııa koroldik otbasy úshin qıyn kezeńde ótti. Hanshaıym Mette-Marıtke ókpe fıbrozy dıagnozy qoıyldy.
Ol sondaı-aq jynystyq qanaýshylyq jasady dep aıyptalǵan amerıkalyq qarjyger Djeffrı Epshteınmen burynǵy baılanysy úshin synǵa ushyrady.
Norvegııa prokýratýrasy hanshaıymnyń ulyna jeti jylǵa bas bostandyǵynan aıyrý jazasyn surady.
