Norvegııa genderlik teńdik reıtınginde Shvetsııany basyp ozdy

ASTANA. KAZINFORM — Shvetsııa genderlik teńdik boıynsha óz pozıtsııasyn joǵaltyp aldy, qazir kósh basynda — Norvegııa tur, dep habarlaıdy AZERTADJ.

Allbright qory Skandınavııa elderindegi kompanııalardyń basshylyq quramyndaǵy genderlik teńdik jóninde jańa esep jarııalady.

AZERTADJ agenttiginiń habarlaýynsha, zertteý nátıjeleri Shvetsııada bul saladaǵy ilgerileý baıaýlaǵanyn, al Norvegııa 2006 jyly qabyldanǵan kvota týraly zańnyń arqasynda eń joǵary jetistikke jetkenin kórsetedi.

Shvetsııada kompanııalar dırektorlar keńesindegi áıelderdiń úlesi 37%-dan 36%-ǵa tómendegen, biraq atqarýshy toptarda 1%-ǵa artqan. Soǵan qaramastan, negizgi laýazymdardy er adamdar ıelenip otyr.

Norvegııada áıelder dırektorlar keńesiniń 41%-yn, al Danııada tek 30%-yn quraıdy. Degenmen, Danııa sońǵy jyldary bul baǵytta eń jyldam damyp kele jatqan el bolyp otyr — úsh jylda áıelderdiń úlesi 15%-dan 23%-ǵa deıin ósken.

Qor basshysy Amanda Lýndeteg Shvetsııa úshin kvota júıesi ámbebap sheshim emes ekenin aıtady, sebebi elde belgili bir deńgeıde teńdikke qol jetkizilgen. Ol júıeli tásildiń mańyzdylyǵyn atap ótti: mindetti maqsattar qoıý, kompanııalardyń eseptiligin arttyrý jáne erler men áıelder arasynda dekrettik demalysty teń bólý qajet.

Qor Skandınavııa elderi genderlik teńdik boıynsha álemdik kóshbasshylyq ornyn joǵaltyp alýy múmkin ekenin eskertedi, óıtkeni kóptegen eýropalyq memleketter bul kórsetkishter boıynsha olardy qýyp jetip keledi.

A. Lýndeteg saıasatkerlerdi teńdik salasynda mindetti maqsattar engizýge, memlekettik satyp alýlarda genderlik strategııaǵa qoıylatyn talaptardy kúsheıtýge jáne jeke dekrettik demalystar engizýge shaqyrdy. Onyń aıtýynsha, genderlik teńdik pen ártúrlilik — tek formaldylyq emes, bıznestiń básekelestik artyqshylyǵyna aınalýy tıis.

Budan buryn Shvetsııa eline oralǵysy keletin mıgranttarǵa jeńildikterdi kóbeıtetini aıtyldy.