Norvegııa benzınmen júretin kólikterge qaraǵanda elektromobılder sany boıynsha kósh bastady

ASTANA. KAZINFORM – Norvegııada elektromobılder sany alǵash ret benzınmen júretin kólikterdiń sanynan asyp tústi. Bul týraly eldiń Jol qozǵalysy boıynsha aqparat keńesi málimdedi.

Norvegııada barlyǵy 2,8 mıllıon jeńil avtokólik tirkelgeni atap ótildi. Onyń 754 303-i elektromobıl bolsa, 753 905-i benzınmen júretin kólikter. Gıbrıdti kólikter sany 366 myńǵa jýyq. Taǵy mıllıonǵa jýyq dızeldi kólikter bar, biraq olardyń sany azaıyp barady.

– Bul tarıhı oqıǵa. On jyl buryn mundaı jaǵdaı bolady dep eshkim kútpegen. Norvegııa jolaýshylary elektromobılder basym bolatyn álemdegi birinshi el bolý úshin jyldam qadamdar jasapı otyr, – dedi Jol qozǵalysy boıynsha aqparat keńesiniń dırektory Oıvınd Solberg Torsen.

Onyń boljamy boıynsha, 2026 jylǵa qaraı eldegi elektromobılder sany dızeldi kólikterden de asyp túsedi.

2024 jyldyń tamyz aıynda Norvegııada satylǵan 11 114 kóliktiń 94 paıyzy elektr qýatymen júretini habarlandy. Bul ósimge Tesla Model Y satylymy (shamamen eki myń avtokólik) yqpal etti.

The Washington Post basylymynyń jazýynsha, elde Norvegııa úkimeti bastamalarynyń arqasynda elektromobılder sany kósh bastap tur. Atap aıtqanda, túrli salyqtar alyp tastalǵan, turaq aqysyn tómendetilgen jáne mundaı kólikter úshin avtobýs jolaqtaryn paıdalanýǵa ruqsat berilgen.