Norvegııa AQSh-tyń óz ımportyna engizetin jańa baj salyǵyna qarsy shyqty
ASTANA. KAZINFORM — Norvegııa AQSh-tyń norvegııalyq ımportqa 12,5 paıyzdyq jańa baj salyǵyn engizýine úzildi-kesildi qarsy shyqty. El bıligi Vashıngtonnyń birjaqty sharalaryn negizsiz dep atady. Bul týraly Sınhýa agenttigi jazdy.
— AQSh-tyń Norvegııaǵa jáne basqa elderge birjaqty tarıf engizýimen úzildi-kesildi kelispeımiz. Sondaı-aq bul jańa tarıfti engizýge keltirilgen negizdememen de kelispeımiz», — dedi Norvegııanyń syrtqy ister mınıstri Espen Bart Eıde málimdemesinde.
AQSh Norvegııadan jáne taǵy ondaǵan elden ımporttalatyn taýarlarǵa qosymsha 12,5 paıyzdyq tarıf engizetinin jarııalady. Ol merzimi juma kúni aıaqtalatyn 10 paıyzdyq jahandyq qosymsha tarıftiń ornyna engiziledi. Vashıngton bul elderdiń májbúrli eńbek arqyly óndirilgen taýarlaryna tyıym salmaǵanyn málimdep otyr.
Norvegııa tarıfti negizsiz dep sanaıdy. Espen Bart Eıdeniń málimdemesinde májbúrli eńbekpen óndirilgen taýarlardyń saýdasyna jol bermeıtin naqty erejeler qazirdiń ózinde bar ekeni aıtylǵan.
Norvegııa úkimetiniń baǵalaýynsha, AQSh-tyń elden ımporttaıtyn taýarlarynyń shamamen 67 paıyzy jańa baj salyǵyna túsedi. Qalyptasqan jaǵdaıǵa baılanysty kásipodaqtar, jumys berýshiler uıymdary men iskerlik qaýymdastyqtar jaqyn arada arnaıy keńeske shaqyrylmaq.
Aıta keteıik, Tramp Kanadadan ımporttalatyn birqatar taýarǵa 50 paıyzdyq baj salyǵyn engizdi.
