Norveg premeri taksıst bolyp astyrtyn jumys jasady
ASTANA. 12 tamyz. QazAqparat - Norvegııa premer-mınıstri Iens Stoltenberg jýrnalısterge maýsym aıynda bir kún taksıst bolyp astyrtyn jumys jasaǵanyn áńgimeledi, dep habarlady Bı-Bı-Sı.
Premerdiń aıtýynsha, ol 2013 jyldyń qyrkúıeginde bolatyn parlamenttik saılaýdyń aldynda qarapaıym norvegtermen shúıirkelesip, jaı-kúıin bilmek bolǵan.
«Men adamdar ne oılaıtynyn bilgim keldi», - dep málim etti úkimet basshysy.
Stoltenberg halyq kóbirek júretin, ózderiniń oılarymen emen-jarqyn bólisetin jerlerde jumys jasaǵan. Ol ózin bildirtpeý úshin kózine kúnnen qorǵaıtyn kózildirik kıip, Oslo taksısteriniń jumys kıimin kıgen.
Alaıda jolaýshylar onyń kádimgi taksısterden ózgeshe adam ekenin baıqaǵan.
Klıentterdiń biri taksıske qarap, «Siz Stoltenbergke uqsaıdy ekensiz!» degen oıyn da aıtyp úlgergen.
Júrgizýshimen áńgimeleskenderdiń kópshiligi saıasat máselelerin sóz etken.
Avtomobıl salonynda munyń bári jasyryn kameraǵa túsirilip, keıinnen Facebook áleýmettik jelisindegi premerdiń paraqshasyna ornalastyrylǵan.
Ol Stoltenberg kóshbasshysy bolyp tabylatyn Norvegııa jumysshy partııasynyń saılaýaldy jarnamasynda paıdalanylýy múmkin.
Iens Stoltenberg taksı jolaýshylarynan jolaqy almaǵan kórinedi.
