Norveg patsha saraıy monarhtyń naýqas ekendigi týraly aqparatty rastady
OSLO. QazAqparat – Norveg patsha saraıy monarh-korol Haraldtyń syrqat ekendigin rastady. Koroldiktiń resmı málimdemesine sáıkes, memleket basshysynyń naýqastanýyna baılanysty memleketti ýaqytsha onyń uly, murager hanzada Hokon basqarady, dep habarlaıdy QazAqparat tilshisi.
Monarh vırýstyq aýrýdy juqtyrǵan, biraq qanshalyqty dárejede naýqas ekendigi týraly aqparat berilmedi.
«Ákem vırýstyq aýrýdy juqtyryp aldy, biraq ózin jaqsy sezinedi, biz onyń Rojdestvoǵa qaraı jumysyna qaıta kirisetinine senemiz», - dedi Hokon hanzada.
Norveg monarhy ótken aptada bolǵan Úkimet otyrysyna qatyspady. Ol Úkimettiń jańa múshelerinen ant qabyldaýy kerek edi. Patsha mindetterin regent retinde Hokon hanzada oryndady. Sonymen qatar, 82 jastaǵy monarh bıyl Úkimettiń qorytyndy otyrysyna qatyspaıdy, onyń mindetterin murager hanzada oryndaıdy degen qaýeset tarady.
Hokon ákesiniń atynan birinshi ret shyǵyp turǵan joq. 2003 jyly korolde qýyqtyń qaterli isigi anyqtalyp, keıinirek ol emdelip shyqqan. Bir jyldan keıin aq halattylar norveg monarhyna eki ret ota jasap, júrek klapanyn aýystyrdy. 2017 jyly Harald ınfektsııamen aýrýhanaǵa jatqyzylyp, bir aptanyń ishinde qatarǵa qaıta qosyldy. Byltyr sáýirde ákesiniń aıaǵy aýyrǵanyna baılanysty Hokon taǵy da regent qyzmetine kiristi.
Bıyl kúzde patsha dástúr boıynsha parlamenttik maýsymdy asharda Stortıng májilis zalyna burynǵydaı baspaldaqpen emes, lıftimen kóterilgen, buǵan jergilikti sholýshylar alańdap qaldy.
Degenmen, Harald patsha ókimet bıliginen bas tartpaıtynyn birneshe ret málimdegen. Norveg monarhy biraz jasqa kelip qalǵanymen salaýatty ómir saltyn ustanady. Ol jelken qaıyq sportymen kásibı túrde aınalysqan. 1964, 1968 jáne 1972 jyldardaǵy Olımpıada oıyndarynda úsh ret eliniń namysyn qorǵaǵan. Onyń 1982, 1987, 1988 jyldary jelkendi sporttan Eýropa chempıonattarynda ıelengen qola, kúmis jáne altyn medali bar.
Dástúr boıynsha korol otbasy rojdestvo merekesin rezıdentsııalarynyń birinde atap ótetin. Biraq bıylǵy Rojdestvony qalaı toılaıtyny, sonymen qatar buryn ol shetelde ótkizýdi josparlaǵan demalysy da belgisiz kúıde.
Avtory Ilıas Omarov
