Norovırýs indeti: Eýropada taǵy bir krýızdik keme oqshaýlandy
ASTANA. KAZINFORM — Bortynda 1700 adam bar «Ambition» týrıstik kemesi oqshaýlanyp, Frantsııanyń Bordo portyna baılandy, dep habarlaıdy Kazinform agenttiginiń EO-daǵy menshikti tilshisi.
Bul jaǵdaı kemedegi bir jolaýshynyń norovırýsqa shaldyqty degen kúdikke ilinip qaıtys bolǵan soń týyndady.
Frantsýz bıligi Ambition krýızdik kemesiniń (Ambassador Cruise Line kompanııasy) bortyna karantın engizdi. Bortta shamamen 1700 adam bar — 1233 jolaýshy jáne 514 ekıpaj múshesi.
Saqtyq sharalaryna 90 jastaǵy brıtandyq jolaýshynyń qaıtys bolýy sebep boldy. Odan aldyn ala shamalanǵandaı norovırýstan týyndaǵan gastroenterıt belgileri baıqalǵan. Jergilikti bılik pen BAQ málimetinshe, shamamen 50 jolaýshy men ekıpaj múshesinde uqsas belgiler — qusý jáne dıareıa boldy.
Keme Bordoǵa 6 mamyrda Shetland araldarynda bastalǵan sapardan keıin seısenbi, 12 mamyrda keldi. Keme Frantsııanyń Lıverpýl, Belfast jáne Brest qalalaryna toqtady. Jolaýshylarynyń kópshiligi — Ulybrıtanııa men Irlandııa azamattary. Bordodan keıin keme Ispanııaǵa júzýdi josparlaǵan.
Frantsııanyń sanıtarlyq qyzmetteri qosymsha tekserý júrgizip jatyr. Ambassador Cruise Line bortta gıgıenalyq hattamalardy kúsheıtti.
Qazirgi ýaqytta tekserý qorytyndylary alynǵansha jolaýshylardy kemeden túsirý toqtatyldy.
Norovırýs («asqazan tumaýy» dep atalady) óte juqpaly jáne kóbinese krýızdik kemelerde tyǵyz baılanysta bolý jáne ortaq tamaqtaný oryndaryna baılanysty indet týdyrady. Densaýlyǵy nashar egde jastaǵy adamdar úshin ınfektsııa eleýli qaýip tóndirýi múmkin. Bul 2026 jyly krýızdik kemelerde bolǵan alǵashqy osyndaı oqıǵa emes. Buryn krýızdik kemelerde basqa da indetter týraly habarlanǵan bolatyn.
Buǵan deıin Argentınadan Kabo-Verdege júzgen taǵy bir krýızdik keme MV Hondius bortynda hantavırýs indeti anyqtalǵan bolatyn. Infektsııadan úsh jolaýshy qaıtys boldy.
10 mamyrda keme Tenerıfege jetti, keme baılanǵan soń keıbir jolaýshylar birden evakýatsııalandy. Sodan keıin keme bortynda ekıpajdyń 25 múshesi, dáriger jáne medbıkemen birge Nıderlandqa bet aldy. Keme Nıderlandqa 17 mamyrǵa deıin júzip keledi dep kútilip otyr.
QR Densaýlyq saqtaý mınıstrliginiń ókili Jasulan Alpysbaev Jibek Joly telearnasynyń «Búgin.LIVE» baǵdarlamasynda hantavırýstyń qaýiptiligi men odan saqtanýdyń tıimdi joldary týraly egjeı-tegjeıli aıtyp berdi.
