Normatıvtik-quqyqtyq aktilerdiń túpnusqasyn qazaq tilinde jazý qashan zańmen mindetteledi

ASTANA. QazAqparat – Premer-Mınıstrdiń orynbasary Altaı Kólginov Májilis depýtattarynyń saýalyna bergen jaýabynda normatıvtik-quqyqtyq aktilerdiń túpnusqasyn qazaq tilinde jazý qashan zańmen mindetteletinin aıtty, dep habarlaıdy QazAqparat tilshisi.

Premer-Mınıstr orynbasarynyń aıtýynsha, normatıvtik quqyqtyq aktilerdiń qazaq jáne orys tilderindegi mátinderin ázirleýdiń sapasy men túpnusqalylyǵyn qamtamasyz etýge arnalǵan birneshe qujat bar. Atap aıtsaq, bul másele Qazaqstan Respýblıkasynyń 2030 jylǵa deıingi quqyqtyq saıasatynyń tujyrymdamasynda, Konstıtýtsııalyq Keńestiń normatıvtik qaýlylaryn iske asyrý jónindegi is-qımyl josparynda kórsetilgen jáne olarda mynadaı is-sharalar kózdelgen.

«Birinshiden, qazaq jáne orys tilderindegi NQA mátinderiniń maǵynalyq sáıkestigin qamtamasyz etý maqsatynda normatıvtik quqyqtyq bazaǵa tolyǵymen tereń tekserý júrgizý kózdelgen (merzimi – 2023 jylǵy II toqsan);

Ekinshiden, NQA jobalaryn orys tiline aýdarýdy qamtamasyz ete otyryp, olardy qazaq tilinde ázirleý mindetin kezeń-kezeńimen zańnamalyq bekitý josparlanǵan (merzimi - 2024 jylǵy naýryz)», - dep jazady Altaı Kólginov.