Norma shyǵarmashylyq qyzmetin jetildirýge baǵyttalǵan zań jobasy boıynsha kelisim komıssııasy qurylatyn boldy
ASTANA. 22 jeltoqsan. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine norma shyǵarmashylyq qyzmetti jetildirý máseleleri boıynsha ózgerister men tolyqtyrýlar engizý týraly» zań jobasyna Parlament Senaty tarapynan engizilgen ózgeristerdi qarap shyǵyp,
ol boıynsha kelisim komıssııasyn qurý týraly sheshim qabyldady.
Esterińizge sala keteıik, atalǵan zań jobasynyń negizgi maqsaty - barlyq normatıvtik quqyqtyq aktiler úshin biryńǵaı zań tehnıkasynyń talaptaryn zańnamalyq deńgeıde retteý. Bul rette qujatta «zań tehnıkasy» jáne «normatıvtik quqyqtyq aktilerdiń quqyqtyq monıtorıngi» degen uǵymdardy reglamentteý usynylady. Budan bólek, zań jobasy memlekettik organdar ázirlegen zań jobalarynyń mátinderin olardyń ózderiniń ınternet resýrstarynda jarııalaýdy mindetteıdi. Aqparat júıeleriniń qazirgideı shapshań damyp otyrǵan tusynda bul shara ózekti bolyp tabylady jáne quqyq nasıhattaý mindetin atqarady. Zań jobasyna ony iske asyrýǵa qajetti barlyq zańǵa táýeldi normatıvtik-quqyqtyq aktilerdi usyný erejeleri engiziledi. Bul shara zań jobasynyń júzege asyrylǵannan keıingi onyń tıimdiligin kórýge múmkindik beredi. Sonymen qatar ol zańnamaǵa qaıshy keletin, eskirgen jáne jemqorlyq áreketterine jol beretin quqyqtyq normalardy anyqtaýǵa jaǵdaı týdyrady.
Senatorlar Májilis maquldaǵan 20 túzetý engizgen bolatyn. Onyń 15-imen Májilis depýtattary kelispeı, óz ustanymdaryn qorǵamaq nıet bildirdi. Osyǵan oraı, kelisim komıssııasyn qurý týraly sheshim qabyldanyp, onyń quramyna depýtattar saılandy.
