Nómirin jasyrǵan júk kólikteriniń júrgizýshilerine qosymsha jaza qarastyrylyp otyr

ASTANA. KAZINFORM – QR Kólik mınıstri Marat Qarabaev salmaq ólsheıtin kameralardan aýyr júk tasymaldaıtyn karerlik kólikter nómirin búrkemelep jasyryp ótken jaǵdaıda qosymsha jaza bolatynyn aıtty.

- Astanaǵa kiretin joldarǵa 7 kamera (júkti shamadan artyq tıegen kólikterdi anyqtaıtyn) ornatylǵan. Jalpy, elordanyń mańynda 29 karer bar. Qalaǵa kirgen júk kólikterin olar avtomatty túrde ólsheıdi. Osy júıeni bastapqyda iske qosqan kezde, júrgizýshiler kólik nómirin búrkemelep, jasyrý áreketterine baryp júrdi. Keıinnen olarǵa aıyppul salynǵannan keıin, mundaı áreketter toqtady. Atap aıtqanda, olar shamadan tys artyq tıelgen júkti tasymaldap jatqan joq, - dedi M.Qarabaev Senatta joldardyń máselesin talqylaýǵa arnalǵan Úkimet saǵatynan keıin tilshiler suraǵyna jaýap bere otyryp.

Sonymen qatar ol mınıstrlik tıisti zańnamalyq ózgeris engizip jatqanyn aıtty.

- Eger olar (júk kólikteri) nómirin búrkemelese nemese sheship tastasa, olarǵa zańnamaǵa sáıkes qosymsha jaza qoldanylady, - dedi vedomstvo basshysy.

Eske salsaq, byltyr maýsym aıynda QR Kólik mınıstri Marat Qarabaev karerde júrýge arnalǵan HOWO jáne SHACMAN kólikterine elimizdiń joldarynda júk tasymaldaýǵa tyıym salynatynyn aıtty.

Sonymen qatar, QR Kólik mınıstrligi karerlik aýyr júk kólikteriniń jalpyǵa ortaq paıdalanylatyn avtojoldarmen júrýine tyıym salýǵa qatysty túsinik berdi.