Nómirdi ózgertpesten basqa uıaly baılanys operatoryna aýysý tegin bolady
ASTANA. QazAqparat - Naýryz aıynan bastap QR Investıtsııalar jáne damý mınıstrligi uıaly baılanys operatorlarymen birigip nómirlerdi aýystyrý qyzmetin testileýdi bastaıdy. Bul týraly «QazAqparat» HAA-ǵa QR Investıtsııa jáne damý vıtse-mınıstri Asqar Jumaǵalıev málim etti.
«Qazir operatorlar nómirdi aýystyrý boıynsha qyzmetti engizý úshin óz jelileri men qondyrǵylaryn daıyndaý jumystaryn aıaqtaǵaly jatyr. Bizdiń taraptan tehnıkalyq jumystar aıaqtalǵandyqtan, osydan keıin birden testileý sharalaryn bastaımyz. Májilis qaraýynda jatqan «Baılanys týraly» Zańǵa engizilgen túzetýler kúshine engen soń abonentter qyzmetti paıdalana alady», - dedi A.Jumaǵalıev.
Abonenttiń bir operatordan ekinshisine ótýin qamtamasyz etetin mehanızmdi túsindirgen vıtse-mınıstr atalǵan qyzmet tegin bolatynyn aıtty. Ol úshin qyzmetin paıdalanǵysy keletin operatorǵa tıisti ótinish jazýy kerek. Sondaı-aq ol abonent operatoryn aýystyrǵanda burynǵy nómirin, sonyń ishinde 701, 705, 708 jáne t.b prefıksterin de saqtap qalatynyn málim etti.
Osylaısha, bul tehnologııany engizgen soń, telefon nómiri boıynsha onyń operatoryn bile almaıtyn bolamyz.
A.Jumaǵalıev qyzmettiń qosylýy operatorlar arasyndaǵy básekelestikti arttyratynyna senimdi.
«Bul jobany bastaǵanda basty maqsatymyz osy bolǵan edi. Operator onyń abonenti kez kelgen ýaqytta ózge operatorǵa aýysyp ketetinin bilgendikten, ol birinshi kezekte óz qyzmetiniń sapasy, jańa ári paıdaly tarıfti josparlar jaıly oılanatyn bolady», - dedi vıtse-mınıstr.
«Qyzmet qosylǵan ózge elderdi úlgige alyp, operatorlar tarıftik josparlarǵa kóp kóńil bóletin bolady. Olar abonentterine paıdaly baǵamen belgilengen paketti satyp alýǵa, sonymen birge qyzmetti paıdalaný boıynsha kópmerzimdik shart jasasý talabymen mobıldi gadjetterdi úlken jeńildikpen satyp alýyn usynýy múmkin», - dep esepteıdi A.Jumaǵalıev.
A.Jumaǵalıevtiń paıymynsha, ınterkonnekt mólsherlemesiniń (stavkasynyń) bıyl 8 teńgege deıin, kelesi jyly 5 teńgege deıin tómendeýi jańa, áldeqaıda tıimdi tarıfti josparlarynyń paıda bolýyna septigin tıgizedi.
Eske sala keteıik, Elbasynyń mobıldi baılanys qyzmetiniń sapasyn arttyryp, qunyn tómendetý boıynsha tapsyrmasy aıasynda 2013 jyldan MNP qyzmetin engizý bastaldy. Kóptegen elderde, solardyń ishinde Reseıde atalǵan qyzmet aqyly. Al Qazaqstanda ol tegin bolmaq.
