«Nomad» shaıbaly hokkeıden Qazaqstan chempıonatynda jeńimpaz atandy

ASTANA. KAZINFORM - Elordalyq «Nomad» shaıbaly hokkeıden Qazaqstan chempıonatynyń jeńimpazy atandy.

Astanalyq hokkeıshiler fınalda Qaraǵandynyń «Saryarqa» komandasymen sheberlik baıqasty.

Eki komanda arasyndaǵy oıyndar serııasy bes oıynǵa sozyldy. Óz kezeginde «Nomad» qarsylasynan 4 (overtaımda 5:4, 3:2, 5:2, 5:1), «Saryarqa» 1 (7:1) márte basym tústi.

Osylaısha elordalyq klýb bıylǵy jylǵy jeńimpaz atandy.

Endi chempıonattyń qola júldegeri «Torpedo» (Óskemen) - «Qulager» (Petropavl) komandalary arasynda anyqtalady. Qazir oıyndar serııasynda petropavldyq klýb 3:2 esebimen alda keledi. 

Shaıbaly hokkeıden Qazaqstan chempıonaty 1992 jyldan beri turaqty túrde ótkizilip keledi.
Qazirge deıin «Torpedo» - 13, «Beıbarys», «Saryarqa», «Arlan» - 3, astanalyq «Barys» pen «Nomad» - 2, sátpaevtyq «Qazaqmys» pen temirtaýlyq «Bolat» - 1 márteden chempıondyq ataqqa qol jetkizdi.

«Saryarqa» sońǵy ret 2022 jyly jeńimpaz atansa, «Nomad» 2023 jyly osyndaı jeńis tuǵyryna kóterildi.