«Nomad explorer» ekspedıtsııasy Túrkistan qalasyna keldi
TÚRKІSTAN. QazAqparat - Búgin respýblıkalyq deńgeıdegi «Nomad explorer» ekspedıtsııasy Túrkistan qalasyna kelip jetti, dep habarlaıdy QazAqparat Óńirlik kommnýıkatsııalar qyzmetine silteme jasap.
«Ońtústik ańyzdary» degen taqyryppen ótip jatqan týrıstik baǵyt boıynsha kelgen saıahatshylar Túrkistandaǵy Qoja Ahmet ıAsaýı kesenesine zııarat jasap, qoryq-mýzeıdi aralady. Elimizdiń barlyq óńirlerinen kelgen qonaqtar Qazaq handyǵynyń ortalyǵy bolǵan Túrkistan qalasynyń kórikti oryndarymen tanysty.
Túrkistan oblysynyń Báıdibek, Qazyǵurt, Ordabasy, Túlkibas, Tóle bı, Otyrar aýdandary aýmaǵyndaǵy kıeli jáne týrıstik oryndarǵa saıahat jasaǵan qonaqtar Túrkistannyń týrıstik áleýetin óte joǵary baǵalady.
Atap aıtsaq, Aqmeshit úńgiri, Domalaq ana kesenesi, Appaq ıshan meshiti, Qazyǵurt taýy, Aqbýra áýlıe, Ǵaıyp eren Qyryq shilten, Qajymuqan murajaıy, Otyrar qalashyǵy, Arystan bab kesenesi jáne ózge de tarıhı oryndardy aralap, óńirdiń tańǵajaıyp tabıǵatyna tamsandy.
Ekspedıtsııa quramynda júrgen belgili qoǵam qaıratkeri Muhtar Taıjan Túrkistan oblysynyń kórikti oryndarynan erekshe áser alǵanyn aıtty. «Nuq paıǵambardyń kemesi týraly ańyzdar qazaq jáne armıan halyqtarynda bar. Bul - óte erte zamandy sýretteıtin ańyz. Demek, qazaq halqy eń ejelgi ulttardyń biri deýge negiz bar. Qazyǵurt taýynyń baýraıyna kelip, osy tarıhı oryndy óz kózimmen kórdim. Ekspedıtsııa músheleri de rızashylyqtaryn bildirip jatyr. Meniń oıymsha osyndaı is-sharalar arqyly eldiń týrızmi damyp, jurtshylyqtyń týǵan elge, týǵan jerge degen súıispenshiligi oıanady. Túrkistan oblysynyń týrıstik áleýeti óte myqty. Eger osy baǵytta jumys kúsheıe berse, týrızm salasy da damı beredi», - deıdi ol.
Túrkistandaǵy Qoja Ahmet ıAsaýı kesenesine zııarat jasap, kóne jádigerlermen, alyp keseneniń tarıhymen tanysqan saıahatshylar odan keıin Saýran qalashyǵyna jol tartty. Olar sol mańda túneıdi. Erteń ekspedıtsııa múshelerine jáne ózge de saıahatshylarǵa arnalyp úlken týrıstik is-sharalar ótedi. Ulttyq sport túrlerinen saıystar ótip, folklorlyq ansamblderdiń kontserttik baǵdarlamalary usynylmaq.
